चंद्रपूर: खासदार साहेब गेले तेव्हापासून माझ्या पक्षातीलच काही लोक माझा विरोध करत आहेत. या विरोधामुळेच माझ्या पतीचा जीव त्यांनी घेतला. आता ते माझ्या मागे लागले आहेत. एक जीव गेला मात्र आता दुसरा जीव जाणार नाही. याची काळजी मी घेणार आहे, असे वक्तव्य आमदार प्रतिभा धानोरकर यांनी माध्यमांशी बोलताना व्यक्त केले आहे. या वक्तव्यानंतर आता राजकीय वर्तुळात एकच खळबळ उडाली आहे.
एकेकाळी देणारे होते, आज दिल्लीच्या दारात मागणारे झालेत, अमोल कोल्हेंचा दादांवर बोचरा वार
खासदार साहेब गेल्यापासून आठ ते नऊ महिन्यांपासून जे लोक माझा सर्वाधिक विरोध करत आहेत, तेच लोक मी भाजपात जाणार अशा चुकीच्या अफवा पसरवत आहेत. माध्यमांना पॅकेज देऊन चुकीच्या बातम्या पसरवत आहेत. अशा कितीही अफवा पसरवल्या तरी त्याला मी घाबरणारी नाही. मी काँग्रेसची आहे, मी काँग्रेसच्या तिकिटावरच उमेदवारी लढविणार आहे, असा खुलासा आमदार धानोरकर यांनी केला आहे. खासदार बालू धानोरकर यांचा चंद्रपूर काँग्रेसमधील काही नेत्यांनी टोकाचा विरोध केला होता. या विरोधाला धानोरकर पुरून उरले होते. ज्यांनी खासदार धानोरकरांना विरोध केला तेच लोक आता आमदार धानोरकर यांचा विरोध करत आहेत, असा आरोप आमदार धानोरकर यांनी केला आहे.

धानोरकर भाजपात जाणार अशा चर्चा राजकीय वर्तुळात रंगल्या होत्या. या चर्चा घडवून आणल्या गेल्या. याचे खंडण आमदार धानोरकर यांनी केले. आमच्या पक्षात भाजपच्या पेरोलवर चालणारे काही लोकं आहेत. ते स्वतः भाजपमध्ये जाणार आहेत. पण मी भाजपमध्ये जाणार हे आमच्याच पक्षातील लोकांनी भाजपच्या सांगण्यावरून अफवा पसरवल्या आहेत. मी काँग्रेसच्याच तिकिटावर लोकसभा लढवणार आहे, असे धानोरकर यांनी म्हटलं. पुढे त्या म्हणाल्या की, चेंनिथला यांच्यासोबत मतदारसंघाबाबत चर्चा करण्यात आली. मात्र त्यांनी कुठलंच आश्वासन दिलं नाही. काँग्रेसमध्ये वेळेपर्यंत कुठला निर्णय होत नाही. मला कुठले निर्देश नसले तरी माझी तयारी सुरू आहे. मला लोकसभेची निवडणूक लढवायची आहे. पक्ष जो निर्णय घेईल मला ते मान्य असेल, असे धानोरकर म्हणाल्या आहेत.