म. टा. प्रतिनिधी, नाशिक : कॅफेत असलेल्या खोल्यांवरून कॅफे चालकाला धमकावून त्याच्याकडून प्रतिमहा अडीच हजार रुपयांचा ‘हफ्ता’ घेणारा सहायक उपनिरीक्षक संशयित शंकर गोसावी याच्यावर नाशिक शहर पोलिस आयुक्तालयाने कारवाई केली आहे. लाचलुचपत प्रतिबंधक विभागाने गोसावीला अटक करून एक दिवस पोलिस कोठडीत घेतली. त्यानंतर आयुक्तालयाने संशयित गोसावी याला निलंबित केले आहे. याप्रकरणी खात्यांतर्गत चौकशी सुरू आहे.

काय आहे प्रकरण?

लाचलुचपत प्रतिबंधक विभागाने मंगळवारी (दि. ५) संशयित शंकर जर्नादन गोसावी (वय ५३, रा. टाकळी रोड) यांना अडीच हजारांची लाच घेताना अटक केली. गोसावी हे पोलिस आयुक्तालयातील विशेष शाखेत कार्यरत असताना त्यांच्याकडे एका कॅफेसंदर्भात अर्ज प्राप्त झाला. त्यादरम्यान, चौकशी करून कारवाई करण्याऐवजी कॅफे चालकाकडून त्यांनी प्रतिमहा अडीच हजार रुपये घेण्यास सुरुवात केली. दोन महिने पैसे दिल्यानंतर कॅफेचालकाने एसीबीच्या कार्यालयात माहिती दिली. त्यानुसार सापळा रचून संशयिताला एसीबीने अटक केली. या प्रकरणामुळे आयुक्तालयाने संशयित सहायक उपनिरीक्षकाला निलंबित केले आहे. त्याने यापूर्वी बेपत्ता मुलींना शोधण्याचे उत्तम कार्य बजावले होते. मात्र, भाडेतत्त्वावर घर देणे, दगड-विटा, वाळूची विक्रीही केली. त्यामुळे पोलिस कर्तव्या व्यतिरिक्तही त्यांनी व्यवसाय केल्याचे ‘एसीबी’ चौकशीत समोर येत आहे. याप्रकरणी ‘एसीबी’चा तपास सुरू असताना आयुक्तालयानेही खात्यांतर्गत चौकशी सुरू केली आहे.

वर्षभरापूर्वी महासंचालक पदक

सन २०२३ मध्ये महाराष्ट्र दिनानिमित्त जाहीर झालेल्या पोलिस महासंचालक पदकांच्या यादीत शंकर गोसावी यांचेही नाव होते. त्यांना पदक जाहीर झाल्यानंतर तत्कालीन पोलिस आयुक्त अंकुश शिंदे यांनी सन्मानित केले. यासह आयुक्त संदीप कर्णिक यांनीही गोसावी यांचा सत्कार केला होता. तर आयुक्तालयासह नाशिकमधूनही त्यांचे कौतुक करण्यात आले होते. परंतु, वर्षभराने मार्च २०२४ मध्ये त्याच संशयित गोसावी यांनी लाच घेतल्याचे समोर आले. त्यांच्या निवृत्तीला पाच वर्षे शिल्लक होते.