म. टा. प्रतिनिधी, नागपूर: पेंच व्याघ्रप्रकल्पाभोवतीच्या ६० गावांमधील सुमारे सहा हजार श्वानांचे लसीकरण करण्याचा निर्णय प्रकल्प प्रशासनाने घेतला आहे. या श्वानांमधील रेबीज आणि गोचिड यांचे नियंत्रण करण्यासाठी ही मोहीम राबविली जाणार आहे.पेंच व्याघ्रप्रकल्पाच्या बफर प्रदेशातील गावांमध्ये हे लसीकरण केले जाईल. या गावांमध्ये भटक्या श्वानांची संख्या मोठ्या प्रमाणावर वाढली आहे. या श्वानांमध्ये असलेले आजार वन्यप्राण्यांमध्ये पसरू नयेत, याकरिता व्याघ्रप्रकल्प प्रशासनाच्यावतीने उपाययोजना करण्यात येणार आहे. त्याअंतर्गत सहा हजार श्वानांचे लसीकरण केले जाईल. ही मोहीम एक महिन्याच्या कालावधीत पूर्ण करण्याचे लक्ष्य निश्चित करण्यात आले आहे. व्याघ्रप्रकल्पाच्या जवळ असलेल्या गावांमधील श्वानांना पकडण्यासाठी राष्ट्रीय व्याघ्रसंरक्षण प्राधिकरणाने आदर्श पद्धती तयार करून दिली आहे. त्या पद्धतीचा अवलंब करून हे श्वान पकडले जातील. पकडलेल्या श्वानांची मोजणी करून त्यांचे लसीकरण केले जाईल. याशिवाय, श्वानांच्या निर्बीजीकरणाचा कार्यक्रमही राबविला जाणार आहे.

भाजप, काँग्रेसचे ‘दक्षिणायन’, लोकसभा निवडणुकीसाठी विशेष लक्ष; खास रणनीती आखण्यावर भर

वनविभागाने दिलेल्या माहितीनुसार, एप्रिलमध्ये आधी रेबीज आणि गोचिड आजारांकरिता लसीकरण करण्याचे काम हाती घेतले जाणार आहे. श्वानांमधील आजार वन्यप्राण्यांमध्ये पसरल्यास त्यावर नियंत्रण आणणे कठीण होऊ शकते. ते टाळण्यासाठी आधीच लसीकरण मोहीम घेण्यात येते आहे. देशात पहिल्यांदाच अशा प्रकारची मोहीम वनविभागाच्यावतीने राबविली जाणार आहे.

पेंच व्याघ्रप्रकल्पाच्या बफर क्षेत्रात ३९ गावे आहेत. त्याशिवाय, त्याभोवतालची सुमारे २० गावेही या मोहिमेत समाविष्ट करण्यात आली आहेत. या सर्व गावांमधील सर्व श्वानांचे लसीकरण या मोहिमेंतर्गत केले जाणार आहे. याबाबतची तयारी पूर्ण झाली असून पुढील महिन्यात स्वयंसेवी संस्थाच्या सहकार्याने कामाला प्रारंभ केला जाणार आहे.