कोल्हापूर : आगामी लोकसभा निवडणुकीसाठी कोल्हापूर लोकसभा मतदारसंघातून श्रीमंत शाहू महाराज छत्रपती यांना उमेदवारी देत महाविकास आघाडीने महायुतीसमोर मोठं आव्हान निर्माण केलं आहे. महविकास आघाडीने छत्रपती घराण्यात उमेदवारी दिल्याने महायुतीने देखील नवीन खेळी खेळली आहे. शाहू महाराजांविरोधात भाजप नेते समरजीत घाटगेंना उमेदवारी देत नवीन रणनीती आखल्याची माहिती समोर आली आहे. विशेष म्हणजे जरी कोल्हापूरची जागा शिवसेनेला गेली तरीही समरजीत सिंह घाटगे यांना शिवसेनेतून उमेदवारी दिली जाऊ शकते आणि त्यासाठी घाटगे तयार होतील अशी शक्यता आहे.

विद्यमान खासदार संजय मंडलिक यांच्याबद्दल मतदारसंघात असलेल्या नाराजीमुळे त्यांचे तिकीट कापले जाईल अशी चर्चा मागील अनेक दिवसांपासून सुरू होती. सध्या एकीकडे मंडलिक आपणच पुन्हा उमेदवार असल्याचं सांगत असले, तरी दुसरीकडे मात्र कोल्हापूरच्या जागेबाबत वरिष्ठ पातळीवर अनेकांनी समरजित घाटगे यांच्या नावाला पसंती दिल्याची माहिती समोर आली आहे. त्यामुळे जागावाटपात ही सीट कोणाला जाणार यावर समरजीत घाटगे कोणत्या चिन्हावरून निवडणूक लढवणार हे ठरवण्यात येणार आहे.
धनुष्यबाण नाही, तर कमळावर लढण्याची तयारी; पण तिकीट द्या, बारा खासदारांचं शिंदेंना साकडं

भाजपकडून नवी खेळी

लोकसभा निवडणुकीच्या पार्श्वभूमीवर राज्यात जागावाटपावरून भाजप, शिवसेना आणि राष्ट्रवादी या महायुतीत मोठा पेच निर्माण झाला आहे. जागावाटप अद्याप निश्चित झाले नसले तरी भाजप जास्तीत जास्त जागा लढवण्यावर ठाम आहे. यामुळे मित्रपक्षातून नाराजीचे सूर उमटत असून दिल्ली दरबारी बैठकांचं सत्र सुरू आहेत. या बैठकीत कोल्हापूर लोकसभा मतदारसंघाबाबत देखील चर्चा झाली असल्याची माहिती मिळत आहे.
भाजप ‘खूपच मोठा’ भाऊ! राज्यात ३७ जागा लढण्याचे संकेत, मुंबईत ५ मतदारसंघांवर डोळा, शिंदेंना काय?
भाजपाकडून कोल्हापूर लोकसभा मतदारसंघ आपल्या ताब्यात घेऊन येथे उमेदवार बदलण्याच्या हालचाली जोरात सुरू असल्याची माहिती समोर आली आहे. महाविकास आघाडीने कोल्हापूर लोकसभा मतदारसंघातील छत्रपती घराण्यातून शाहू महाराजांना उमेदवारी देत मास्टरस्ट्रोक मारला आहे. छत्रपती घराण्यातील उमेदवार उभा केल्याने महायुती समोर तगडं आव्हान निर्माण झाले आहे. यामुळे भाजप आता छत्रपती घराण्याला तोडीस तोड उमेदवार देण्याच्या तयारीत आहे. या ठिकाणी शाहू महाराजांच्या विरोधात छत्रपती राजर्षी शाहू महाराज यांच्या जनक घराण्यातील कागलमधील समरजीतसिंह घाटगे यांना उमेदवारी देऊन एक नवीन रणनीती महायुती आखत आहे.

केंद्रीय पातळीवर समरजीतसिंह घाटगे यांच्या नावाला पसंती

कोल्हापूर लोकसभा मतदारसंघात विद्यमान खासदार शिवसेना शिंदे गटाचे संजय मंडलिक आहेत. शिवसेनेमध्ये झालेल्या बंडानंतर संजय मंडलिक यांनी ठाकरेंची साथ सोडत मुख्यमंत्री एकनाथ शिंदे यांचा हात धरला. मात्र गेल्या पाच वर्षात संजय मंडलिक मतदारसंघात दिसलेच नाहीत असे म्हणत अनेक मतदारांनी नाराजी दर्शवली. तसेच भाजपने केलेल्या सर्वेक्षणामध्येही विद्यमान खासदाराच्या विरोधात नकारात्मक वातावरण दिसल्याने भाजप येथे उमेदवार बदलाच्या हालचाली करत आहे.
Read Latest Maharashtra News Updates And Marathi News

दुसरीकडे, या जागेवर शिवसेनेने दावा सांगितला असला असून या जागेवरून आपणच उमेदवार असणार असा विश्वास संजय मंडलिक यांनी व्यक्त केला आहे. मात्र भाजप ही जागा आपल्या ताब्यात घेऊन या जागेवरून समरजीतसिंह घाटगे यांना उमेदवारी देणार असल्याच्या चर्चा सध्या सुरू आहेत. केंद्रीय पातळीवर समरजीत सिंह घाटगे यांच्या नावाला पसंती मिळत असून येत्या दोन ते तीन दिवसात महायुतीकडून जागावाटप आणि उमेदवार जाहीर करण्यात येणार आहेत. दरम्यान या संदर्भात समरजित सिंह घाटगेंनी यावर प्रतिक्रिया देणं टाळले असून आपण भाजपचा प्रोटोकॉल पाळणारा व्यक्ती असल्याचे म्हणत सध्या त्यांनी या विषयावर मौन बाळगले आहे.