सोलापूर: सोलापूर जिल्ह्यातील सांगोला तालुक्यातील पाचेगाव येथे एक हृदय पिळटवून टाकणारी घटना घडली आहे. कौटुंबिक वादातून थोरल्या मुलाने वृद्ध आई वडिलांची क्रूरपणे हत्या केली आहे. २९ फेब्रुवारीला सोलापूर जिल्ह्यातील सांगोला येथे या वृद्ध दाम्पत्याच्या डबल मर्डरमुळे सोलापुरात खळबळ उडाली होती. पोलिसांनी कसून तपास करत संशयित आरोपीला ताब्यात घेतले आहे. वृद्ध दाम्पत्याचा थोरला मुलगा समाधान कुंभार यानेच वृद्ध आई-वडिलांना संपवल्याचं समोर आलं. पोलिसांनी समाधान कुंभार याला ताब्यात घेऊन डबल मर्डरचा उलगडला केला. थोरल्या मुलाने जन्म दात्या वृद्ध आई-वडिलांचा खून केल्याची माहिती समोर आल्याने सोलापुरात हळहळ व्यक्त केली जात आहे. भिमराव गणपत कुंभार (वय ७० वर्षे), सुशिला भिमराव कुंभार (वय ६५)असे मयतांची नावे आहेत.
जन्मदात्या आई वडिलांना संपवलं
सांगोला तालुक्यातील मौजे पाचेगाव (बु), येथे राहणारे भिमराव गणपत कुंभार, पत्नी सुशीला कुंभार यांचा खून झाला होता. दोघे वृद्ध आई वडील धाकट्या मुलगा पांडूरंग कुंभार यांच्या घरी राहत होते. ०१ मार्च २०२४ रोजी सायंकाळी ७ वाजण्याच्या सुमारास घराच्या गच्चीवर मयत अवस्थेत आढळून आले होते. भिमराव गणपत कुंभार यांच्या मानेमध्ये लोखंडी रॉड किंवा सळई आरपार घालून आणि मारहाण करून ठार करण्यात आले होते. सुशिला कुंभार यांचे डोके जमीनीवर आपटून गळ्यात काळी केबल गुंडाळून पाठीमागील बाजूस मारहाण करून खून केला होता. सदर खुना बाबत सांगोला पोलिसांत गुन्हा दाखल करण्यात आळा होता.
दोन जेष्ठ नागरिकांचा खून झाल्याने सोलापुरात खळबळ उडाली होती. घटनास्थळी पोलिस अधीक्षक शिरीष सरदेशपांडे, प्रितम यावलकर, (अपर पोलिस अधीक्षक) यांनी भेट दिली होती. मयत भिमराव कुंभार व सुशिला कुंभार हे दोघेजण धाकटा मुलगा पांडूरंग यांच्या घरामध्ये राहत होते. वृद्ध दाम्पत्याचा मोठा मुलगा समाधान कुंभार हा देखील काही अंतरावरच त्याच्या कुटूंबासह वडिलोपार्जीत जुन्या घरामध्ये राहात होता. दुहेरी हत्या झालेले ठिकाण हे पाचेगाव गावामध्ये लोकवस्तीमध्ये होते. यामुळे गुन्ह्याची तीव्रता आणखी वाढली होती. पोलिस निरीक्षक सुरेश निंबाळकर आणि पथकाने पाचेगाव येथे दोन दिवस थांबून मयताची कौटुंबीक परिस्थीती, मयत त्यांची मुले यांच्यामध्ये असलेल्या कौटुंबिक वादाबाबत अधिक माहिती काढली.
कौटुंबिक वादाचा राग मनात ठेवून वृद्ध आई-वडिलांचा काटा काढला
स्थानिक गुन्हे शाखेचे एपीआय शशिकांत शेळके ग्रामीण यांच्या पथकाला घटनास्थळावर दिसून आलेली परिस्थीती, मयताचे मोठ्या मुलामध्ये असलेले कौटुंबिक वितृष्ठ यावरून सदरचा गुन्हा हा थोरल्या मुलानेच केला असल्याची गोपनिय माहिती मिळत होती. मयत पती-पत्नीचा मोठा मुलगा समाधान कुंभार यास ताब्यात घेवून अधिक चौकशी करत विश्वासात घेवून तपास केला असता त्याने सदरचा गुन्हा हा कौटुंबीक वादाचा राग मनात धरून दिनांक २९ फेब्रुवारी २०२३ रोजी गावामध्ये शिवजयंतीची मिरवणूक चालू असताना आई-वडील राहत असलेल्या घरामध्ये जावून त्यांचा खून केल्याचे कबूल केले आहे. या प्रकरणी पोलिसांनी मोठ्या मुलास अटक केली असून पुढील तपास सांगोला पोलिस करत आहेत.