म. टा. खास प्रतिनिधी, मुंबई : मुंबईतील वाहतूक कोंडीवर पर्याय म्हणून उड्डाणपूल आणि उन्नत रस्ता उभारणीचा पर्याय मुंबई महापालिकेकडून निवडण्यात येत आहेत. मढ-वर्सोवा रस्ते प्रवासासाठी लागणाऱ्या अनेक तासांच्या रखडपट्टीतून वाहन चालकांची सुटका करण्यासाठी येथील खाडीवर पूल उभारणी केली जाणार आहे. तर, खार सब वे आणि वांद्रे टर्मिनस कनेक्टर पूर्व-पश्चिम जोडणीसाठी उन्नत रस्ता उभारण्यात येणार आहे. खाडीवर पूल आणि खार सब वेजवळ उन्नत रस्ता उभारणीसाठी मुंबई महापालिकेने निविदा काढली आहे. खाडीवरील पूल उभारणीसाठी तीन वर्षे तर, उन्नत मार्ग उभारण्यासाठी साडेतीन वर्षे लागणार आहेत.मालाड येथून मढ, वर्सोवादरम्यानच्या २१ ते २२ किमी प्रवासासाठी तब्बल दीड तास लागतात. वाहतूककोंडी झाल्यास हाच प्रवास कालावधी आणखी वाढतो. वर्सोवा-मढदरम्यान फेरी बोट प्रवासाची सुविधा आहे. या फेरी प्रवासात दुचाकी वाहने आणि प्रवाशांचीही वाहतूक होते. मात्र पावसाळ्यात या फेरी बोट बंद असतात. तर ओहोटीच्या वेळीही त्या बंद ठेवाव्या लागतात. त्यामुळे रस्तामार्गे प्रवास करण्याशिवाय पर्याय नसतो. वाहन चालकांना होणारा मनस्ताप पाहता मढ-वर्सोवा खाडीवर पूल उभारणी करून दिलासा देण्याची मागणी होत होती. त्यानुसार पालिकेने खाडीवर पूल उभारणीचा निर्णय घेतला. महाराष्ट्र किनारा क्षेत्र व्यवस्थापन प्राधिकरणाने फेब्रुवारी २०२३मध्ये यास मंजुरी दिली. तर नुकतीच सीआरझेडकडून परवानगी मिळाली.
Sanjay Raut: जे तुरुंगात हवेत, ते निवडणूक रिंगणात; हीच का मोदी गॅरंटी? संजय राऊतांचा सवाल

या परवानगीनंतर मुंबई महापालिकेच्या पूल विभागाने पूलाचा आराखडा आणि बांधकामासाठी निविदा काढली आहे. या पुलाची उभारणी तीन वर्षांत करावी लागणार आहे. पूल उभारणी झाल्यानंतर हाच प्रवास अवघ्या दहा मिनिटांत होणार आहे. बोटींच्या मार्गातील अडथळे आणि बांधकामावेळी गाळ साचण्याची शक्यता यामुळे मच्छिमारांनी प्रकल्पाला विरोध केला होता. मात्र प्रकल्पाचे महत्त्व सांगितल्यानंतर हा विरोध मावळला. मढ-वर्सोवा पुलाची लांबी ही साधारण दीड किमी आहे. या पुलामुळे अंधेरी, मढ, बोरिवली आणि गोराई भागातील वाहतूक सुधारणार आहे.

पूर्व-पश्चिम जोडणीसाठी उन्नत मार्ग

पूर्व आणि पश्चिमेला जोडणाऱ्या खार सब वेमध्ये पावसाळा किंवा अन्य वेळी मोठी वाहतूककोंडी होते. यातून सुटका करण्यासाठी मुंबई महानगरपालिकेने खार सब वे पूर्व-पश्चिम आणि वांद्रे टर्मिनस कनेक्टर पूर्व-पश्चिम जोडणी देण्यासाठी उन्नत मार्ग उभारण्याचा निर्णय घेतला आहे. याचे तीन टप्प्यांत काम होणार असून त्याच्या बांधकामासाठीही निविदा काढली आहे. साधारण पाच किलोमीटर लांबीचा हा पूल असेल. सुमारे ५०० कोटी रुपयांहून अधिक खर्च अपेक्षित आहे. तीन टप्प्यांत उड्डाणपूल होताना यापैकी पहिल्या टप्प्यात सांताक्रूझ पूर्व नेहरू रोड येथून पुलाची सुरुवात सुरू होऊन खार पश्चिमेला तो संपेल. खार पश्चिमेकडून वेस्टर्न एक्स्प्रेस हायवेजवळील सर्व्हिस रोडपर्यंत जाणार आहे. दुसऱ्या टप्प्यात वांद्रे स्थानक आणि टर्मिनस येथून वेस्टर्न एक्स्प्रेस हायवेवरील सांताक्रूझ चेंबूर लिंक रोडपर्यंत उन्नत मार्गिका बांधली जाणार असून ती सव्वादोन किलोमीटर लांबीची असेल. तर तिसऱ्या टप्प्यात वेस्टर्न एक्स्प्रेस हायवेवरील सांताक्रूझ चेंबूर लिंक रोड येथूनच एअर फोर्सच्या जागेतूनही उन्नत मार्ग जाऊन तो खार सब वेवरील उड्डाणपुलाला जोडला जाईल.