म. टा. प्रतिनिधी, पिंपरी : रस्त्यावर ४५ किलो मेफेड्रोन (एमडी) असलेले पोते सापडले आणि पिंपरी-चिंचवड पोलिस आयुक्तालयातील एका उपनिरीक्षकाचे डोळे फिरले. हे मेफेड्रोन पोलिसांकडे देण्याऐवजी त्याने लपवून आपल्या मालकीच्या हॉटेलमधील कर्मचाऱ्याच्या मदतीने विकण्याचा डाव रचला. पोलिसांना याची खबर लागताच संबंधित पोलिस उपनिरीक्षकाचा झटपट श्रीमंत होण्याचा डाव फसला आणि तो अलगद पोलिसांच्या जाळ्यात अडकला.
पोलिसाला कोठडीची हवा
विकास शेळके असे अटक केलेल्या पोलिस उपनिरीक्षकाचे नाव आहे. तो निगडी पोलिस ठाण्यात कार्यरत होता. या प्रकरणी शेळके याच्या हॉटेलमधील कामगार नमामी शंकर झा (वय ३२, रा. निगडी. मूळ रा. बिहार) याला सुरुवातीला अटक करण्यात आली. त्याने शेळके याचे नाव घेतल्याने त्याला ताब्यात घेऊन चौकशी केली असता हा प्रकार समोर आला. पोलिस अंमलदार विजय मोरे यांनी सांगवी पोलिस ठाण्यात तक्रार दिली आहे. शेळके याला न्यायालयात हजर केले असता सात दिवसांची पोलिस कोठडी सुनावण्यात आली आहे.
~ ४५ कोटींचे मेफेड्रोन जप्त
पोलिसांनी दिलेल्या माहितीनुसार, एक व्यक्ती विशालनगर परिसरात मेफेड्रोन विक्रीसाठी येणार असल्याची माहिती सांगवी पोलिस ठाण्यातील अंमलदार विवेक गायकवाड यांना मिळाली होती. त्यानंतर सांगवी पोलिसांनी सापळा रचून झा याला दोन किलो मेफेड्रोनसह ताब्यात घेतले. त्याच्याकडे केलेल्या अधिक चौकशीत शेळके याने ड्रग्स त्याच्याकडे दिल्याचे समोर आले. त्याच्याकडून ४५ कोटी रुपयांचे ४५ किलो मेफेड्रोन आतापर्यंत जप्त करण्यात आले आहे.
रस्त्यावर पडले होते मेफेड्रोन
२६ फेब्रुवारीला एका गाडीतून मेफेड्रोन असलेले पोते रस्त्यावर पडले. कारचालक ईश्वर मोटे यांनी ते पोते रस्त्यावरून बाजूला ठेवले. मोटे यांनी पोते उघडून पाहिले असता आत काळसर रंगाचा पदार्थ दिसला. हा एका कंपनीचा कच्चा माल असल्याचा त्यांचा समज झाला. त्यांनी नाकाबंदीतील पोलिस अंमलदार सुधीर ढवळे आणि अनिल चव्हाण यांच्याकडे पोते दिले. यातील ढवळे हा शेळके याचा रायटर होता. त्याने याबाबत शेळके याला माहिती दिली. शेळकेने पोते लपवून ठेवण्याचा आणि वाच्यता न करण्याचा सल्ला दिला. त्यानुसार, ढवळे आणि चव्हाण यांनी पोते लपवून ठेवले.
मेफेड्रोन पाहून फिरले डोळे
४५ कोटी रुपयांचे मेफेड्रोन पाहून शेळके याचे डोळे फिरले. मेफेड्रोन विक्रीतून आपण कोट्यधीश होऊ, असे स्वप्न त्याने रंगवले. मेफेड्रोन विक्री करण्याचा प्लॅन रचला. रावेतमधील नामचीन गुन्हेगाराकडे झा याला पाठवले. मात्र, गुन्हेगाराने सांगवी येथील एका पोलिस कर्मचाऱ्याला याबाबत टीप दिली. संबंधित पोलिस कर्मचाऱ्याने वरिष्ठांच्या कानावर ही बाब घातली. वरिष्ठांच्या सूचनेनुसार सापळा रचून झा याला ताब्यात घेतले. पोलिसी खाक्या दाखवतात त्याने शेळके याचे नाव घेतले.
कारचालक अनभिज्ञ…
शेळके याच्या कबुली जबाबानंतर पोलिसांनी कारचालक ईश्वर मोटे यांना छत्रपती संभाजीनगर येथील त्याच्या मूळ गावातून ताब्यात घेतले. मोटे यांनी पोलिसांना सर्व हकीकत सांगितली. त्यानुसार, पोलिसांनी माहिती पडताळून पाहिली असता त्यामध्ये तथ्य आढळून आले. याबाबतचे काही ‘सीसीटीव्ही’ फुटेजही पोलिसांना मिळाले आहे. त्यामुळे मोटे यांची काहीही चूक नसल्याचे सांगितले जात आहे.