नाशिक : करिअरचं स्वप्नं उराशी बाळगून इराणला निघालेले निफाड तालुक्यातील दोन तरुण प्रत्यक्षात मात्र थेट कुवेतच्या जेलमध्ये पोहोचले. नशिब बलवत्तर म्हणून या प्रवासात जे जहाज बुडाले त्यातून केवळ हे दोघेच बचावले. भारतीय दुतावास आणि कुवेतमधील वर्कर्स युनियनचे नाशिकमधील पदाधिकाऱ्यांनी अत्यंत वेगाने यशस्वी मध्यस्थी केल्याने हे दोघेही युवक शुक्रवारी (दि. १) घरी सुखरुप परतले.निफाड तालुक्यातील तारुखेडले आणि खांडगाव थडी येथील अविष्कार जगताप (वय २०) व निवृत्ती बागूल (वय २५) हे दोघेही तरुण एका भारतीय एजंटमार्फत २०२३ मध्ये मर्चंट नेव्हीत सहभागासाठी इराणला गेले होते. समुद्रमार्गे सुरू असलेल्या प्रवासात इराणी मालवाहू ‘बहारेह’ हे जहाज १९ जानेवारीला कुवेतच्या किनाऱ्यावर बुडाले. या दुर्घटनेवेळी अविष्कार व निवृत्तीसह पाच इराणी व सात नाविक जहाजावर होते. मात्र, त्यातून केवळ अविष्कार व निवृत्ती हे दोघेच बोटीद्वारे जीव वाचवण्यात यशस्वी झाले.
अजितदादा म्हणतील PMC कशाला, खातंच द्या; पण ते देणार नाही, माझ्याकडेच ठेवेन, फडणवीसांची कोपरखळी
या दोघांनाही कुवेतमधील अधिकाऱ्यांनी रुग्णालयात दाखल केले व नंतर पोलिसांनी ताब्यात घेतले. जहाज दुर्घटनेत आपली पासपोर्ट व इतर महत्त्वाची कागदपत्रे हरवल्याचे या दोघांनीही सांगितले. बागूल आणि जगताप हे कोणत्या जेलमध्ये आहेत व त्यांच्यावर कुठल्या स्वरूपाचा गुन्हा दाखल आहे, याबाबत त्यांनी माहिती घेत सुटकेसाठी अधिकाऱ्यांशी पत्रव्यवहार केला.

या संदर्भात भारतीयांना जगताप व बागूल तात्काळ कॉन्सुलर प्रवेश प्रदान करण्यासाठी व त्यांच्या तात्काळ मायदेशी परतण्यासाठी भारतीय दुतावासाकडे हस्तक्षेपाची विनंती केली. तसा मेल ऑल इंडिया सीफेरर्स अँड जनरल वर्कर्स युनियनचे अध्यक्ष संजय पवार यांनी परराष्ट्रमंत्री डॉ. जयशंकर यांना केला.

विशेष म्हणजे याबाबत कुवेतमधील भारतीय दूतावासाने सकारात्मक प्रतिसाद देत बागूल व जगताप यांच्या मायदेशी परत पाठवण्याच्या हालचाली सुरू केल्या. त्यासाठी पासपोर्ट आणि आवश्यक त्या सुविधा पुरवल्या. त्यानंतर त्यांना मायदेशी परत पाठवल्याचे अविनाश जगताप यांनी सांगितले. अविष्कार व निवृत्ती हे दोघेही शुक्रवारी (दि.१ ) सायंकाळी निफाडमध्ये पोहोचले. मृत्यूच्या दारातून परत आलेल्या या दोघांना पाहून त्यांच्या कुटुंबाच्या आनंदाला पारावार उरला नव्हता.