म. टा. वृत्तसेवा, पालघर : शटल आणि पॅसेंजर ट्रेनचे तिकीट दर एक्सप्रेस गाड्यांप्रमाणे करण्यात आल्याने गेले कित्येक महिने रेल्वेप्रवाशांच्या खिशाला कात्री लागत होती. प्रवाशांनीच याविरोधात सह्यांची मोहीम उघडल्यानंतर अखेर उशिरा का होईना पण रेल्वे प्रशासनाला जाग आली आहे. शटल-पॅसेंजर ट्रेनचे वाढवलेले तिकीट दर कमी करण्याचे धोरण रेल्वेने जाहीर केले आहे.करोना काळानंतर पश्चिम रेल्वेची सेवा हळूहळू सुरळीत झाल्यावर दररोजच्या काही शटल व पॅसेंजर गाड्यांच्या तिकीटांचे दर एक्सप्रेस गाड्यांप्रमाणे ठेवले होते. त्यामुळे सर्वसामान्य प्रवाशांना आर्थिक भुर्दंड पडत होता. जवळपास दोन वर्षे हे सुरू होते. बलसाड फास्ट पॅसेंजर, अहमदाबाद पॅसेंजर व इतर पॅसेंजर व मेमू रेल्वेगाड्यांना सर्वसामान्य दरांपेक्षा अधिक, म्हणजे एक्सप्रेस गाड्यांची वाढीव तिकीट दर आकारण्यात येत होते. त्यामुळे प्रवास करायचा शटल गाडीने आणि दर द्यायचे एक्सप्रेस ट्रेनचे, असे प्रवाशांना करावे लागत होते. येथील स्थानिक खासदार, रेल्वे संघटना व रेल्वेच्या समितीवर असणाऱ्या पदाधिकाऱ्यांनी, हे तिकीट दर पूर्ववत व्हावे यासाठी वेळोवेळी प्रयत्न केले होते. मात्र रेल्वे प्रशासनाने त्यांना साधारणपणे दोन वर्ष दादच दिली नाही. तिकीट दर लुटीविरुद्ध रेल्वेमंत्री, खासदार रेल्वे महाप्रबंधक, रेल्वे वाणिज्य प्रबंधक यांच्याकडे तक्रारी करून देखील त्याची दखल घेतली जात नव्हती. मात्र प्रवाशांनीच याविरुद्ध स्वाक्षरी मोहीम उघडल्यानंतर रेल्वे प्रशासनास जाग आली आहे. हे दर आता पूर्ववत करण्यात येत आहेत. प्रवाशांवर पडणाऱ्या आर्थिक भारातून लवकरच त्यांची सुटका होणार आहे.
मुंबईत हुडहुडी वाढली, पारा १५ अंशावर, आठवडाभर पहाटे गारवा; पाच जिल्ह्यांना ऑरेंज अलर्ट

या सर्व गाड्यांमधून वैतरणापासून ते बलसाड, अहमदाबादपर्यंतचे प्रवासी प्रवास करत होते. सर्वसामान्यांच्या गाड्या म्हणून ओळखल्या जाणाऱ्या वलसाड फास्ट पॅसेंजर, अहमदाबाद पॅसेंजर, मेमू, विरमगाव पॅसेंजर या गाड्यांत रेल्वेच्या आडमुठ्या धोरणामुळे वाढीव दर आकारण्यात येत होते. हे दर सर्वसाधारण शटल पॅसेंजर गाड्यांप्रमाणे करण्याच्या सूचना रेल्वे अधिकाऱ्यांनी संबंधित स्टेशनवर तिकीट विक्री करणाऱ्या अधिकाऱ्यांना दिले असल्याचे सांगण्यात येत आहे. याबद्दल रेल्वे प्रवाशांनी समाधान व्यक्त केले आहे.