म. टा. प्रतिनिधी, छत्रपती संभाजीनगर : वाढीव पाणी मिळण्यासाठी शहरवासीयांना किमान वीस दिवसांची प्रतीक्षा करावी लागणार आहे. नऊशे मिलीमीटर व्यासाच्या जलवाहिनीसाठी तीन ठिकाणी स्वतंत्र पंप बसवण्याचे काम केले जाणार असून, त्यापैकी एक पंप बसवण्यात आला असल्याची माहिती महाराष्ट्र जीवन प्राधिकरणाचे अधीक्षक अभियंता आर. एस. लोलापोड यांनी दिली.
शहरासाठीच्या ७०० मिलीमीटर व्यासाच्या पाणीपुरवठा योजनेचे पुनरुज्जीवन करण्याचा निर्णय घेतल्यानंतर ७०० मिलीमीटर व्यासाच्या जलवाहिनीच्या शेजारून जायकवाडी ते नक्षत्रवाडी दरम्यान ९०० मिलीमीटर व्यासाची नवीन जलवाहिनी टाकण्यात आली आहे. या जलवाहिनीची चाचणी करुन ती सुरू करण्यासाठी १२०० मिलीमीटर व्यासाच्या जलवाहिनीला ९०० मिलीमीटर व्यासाची जलवाहिनी जोडण्यासाठी क्रॉसकनेक्शन करण्याचा निर्णय घेण्यात आला. क्रॉसकनेक्शन करण्यासाठी १४ फेब्रुवारी शटडाउन घेण्यात आला. शटडाउनच्या दरम्यान तांत्रिक अडचणी निर्माण होत गेल्याने एक दिवसांचा शटडाउन चार दिवसांवर जाऊन पोहोचला. त्यामुळे शहराला आठ ते दहा दिवसांसाठी पाणीबाणीला सामोरे जावे लागले.
या घटनेनंतर १२०० मिलीमीटर व्यासाच्या जलवाहिनीला क्रॉसकनेक्शन करण्याचा प्रयत्न महाराष्ट्र जीवन प्राधिकरणाने सोडून दिला. क्रॉसकनेक्शनऐवजी जायकवाडी, फारोळा आणि नक्षत्रवाडी या ठिकाणी प्रत्येकी एक या प्रमाणे ४५० एचपी क्षमतेचा पंप बसवण्याचा निर्णय घेण्यात आला. याबद्दल माहिती देताना लोलापोड म्हणाले, ‘जायकवाडी येथील पंपहाउसमध्ये पंप बसवण्याचे काम पूर्ण झाले आहे. आता फारोळा आणि नक्षत्रवाडी येथे पंप बसवण्यात येत आहेत. हे काम पूर्ण झाल्यावर पाचव्या किंवा सहाव्या दिवशी जलवाहिनीची चाचणी घेण्याचे काम सुरू केले जाईल. चाचणी यशस्वी झाल्यावर ९०० मिलीमीटर व्यासाच्या जलवाहिनीतून पाणीपुरवठा सुरू केला जाईल. मार्च महिन्याच्या पहिल्या आठवड्यापर्यंत हे काम करण्याचे नियोजन आहे.’
मार्चच्या दुसऱ्या आठवड्यापर्यंत शहराला वाढीव पाणी मिळेल, असे गृहीत धरायचे का असा प्रश्न त्यांना विचारला असता, ‘त्यापूर्वीच वाढीव पाणी मिळावे, असा आमचा प्रयत्न आहे,’ असे ते म्हणाले.