सोलापूर : राष्ट्रीय समाज पक्षाचे नेते महादेव जानकर हे माढा मतदारसंघातून आगामी लोकसभा निवडणूक लढणार आहेत. शरद पवार आणि महादेव जानकर यांच्यात गोपनीय चर्चा झाल्याची माहिती विश्वसनीय सूत्रांकडून मिळाली आहे.
महादेव जानकर हे स्वत: माढा लोकसभा मतदारसंघातून निवडणूक लढवणार असल्यामुळे माढा लोकसभा मतदारसंघात बेरजेचे राजकारण सुरू झालं आहे. महायुतीमध्ये असून देखील राष्ट्रीय समाज पक्षाचे अध्यक्ष महादेव जानकर हे वारंवार भाजपला आव्हान देताना दिसत आहेत. शरद पवारांनी दिलेल्या शब्दांमुळे माढ्यातून भाजप विरोधात रासप अशी सरळ लढत होणार असल्याचे म्हटले जात आहे.
महायुतीत बिघाडी अन् जानकरांनी दंड थोपटले
माढा लोकसभा मतदारसंघात महायुतीत बिघाडी झाल्याचे पाहायला मिळत आहे. भाजपचे खासदार रणजितसिंह नाईक- निंबाळकर यांच्या विरोधात अजित पवार गटाचे रामराजे नाईक- निंबाळकर यांचे बंधू संजीवराजे नाईक- निंबाळकर यांची लोकसभेच्या उमेदवारीबाबत चर्चा होत आहे.
महादेव जानकर यांनी माढा आणि परभणी लोकसभा मतदारसंघातून आपले दंड थोपटले आहेत. महादेव जानकरांनी भाजपला इशारा दिला आहे. भाजपपासून दुरावलेले राष्ट्रीय समाज पक्षाचे अध्यक्ष, आमदार महादेव जानकर यांनी आगामी लोकसभेची निवडणूक माढा आणि परभणी या दोन्ही जागांवर लढवणार असल्याचे जाहीर केले आहे. या दोन्ही जागांवर भरघोस मतांनी निवडून येण्याचा विश्वासही महादेव जानकरांनी या अगोदर व्यक्त केला आहे.
सातारा आणि सोलापूर जिल्ह्यात पसरलेल्या माढा लोकसभा मतदारसंघासाठी जागावाटपापूर्वीच महायुतीकडून जोरदार तयारी असून भाजपचे विद्यमान खासदार रणजितसिंह यांनी गोळाबेरजेस सुरूवात केली आहे.
त्यांना लेकीला सीएम करायचंय; शाहांच्या टीकेवर पवार म्हणाले, अमित भाईंना आधी कळायला हवं की…
लोकसभेचा माढा मतदारसंघ २००९ साली अस्तित्वात आला. त्या निवडणुकीत शरद पवारांनी जानकरांचा पराभव केला होता. सोलापूर जिल्ह्यातील माढा, सांगोला, करमाळा आणि माळशिरस तर साताऱ्यातील माण व फलटण विधानसभा मतदारसंघांचा यामध्ये समावेश आहे. पहिल्या दोन टर्म राष्ट्रवादीचे अध्यक्ष शरद पवार आणि माजी उपमुख्यमंत्री विजयसिंह मोहिते-पाटील यांनी मतदारसंघाचे नेतृत्व केले.
Read Latest Maharashtra News Updates And Marathi News
२०१९ च्या निवडणुकीत राष्ट्रवादीच्या गडाला भगदाड पाडत भाजपच्या रणजितसिंह नाईक-निंबाळकर यांनी विजय मिळवला. मागील पाच वर्षांच्या काळात मतदारसंघात अनेक उलथापालथी झाल्या. उपमुख्यमंत्री अजित पवार भाजपबरोबर आल्याने युतीची ताकद वाढली आहे. त्यामुळे मतदार संघातील विधानसभेचे सर्व सहा आमदार महायुतीचेच आहेत. महायुतीत मतदार संघावर भाजपचा दावा आहे. शरद पवारांनी माढा मतदारसंघ खेचून आणण्यासाठी राजकीय गणितं मांडण्यास सुरुवात केली आहे.