प्रियंका पाटील शेळके – बोबडे
अहमदनगर: अपयशाला कधी कधी नतमस्तक व्हावं लागतं. माणसाची परिस्थिती कशीही असो, मात्र जिद्द, चिकाटी आणि अभ्यासाची तयारी असल्यास नशिबाचे फासे फिरवता येतात. घरात अधिकारी पदाचा कोणताही वारसा नसताना अधिकारी होण्याचे स्वप्न साकारता येते. याची प्रचिती ग्रामीण भागातील ठाकूर निमगाव (ता. शेवगाव) येथील शेतकरी कुटुंबातील जयश्री रमेश कातकडे हिने दिली. जयश्रीचे सातवीपर्यंतचे शिक्षण गावातीलच जिल्हा परिषद शाळेमध्ये पूर्ण झाले.
कौतुकास्पद! ग्रामीण भागातील विद्यार्थ्याचा जेईई परीक्षेत डंका; शेतकऱ्याचा मुलगा राज्यात पहिला
पुढील शिक्षणासाठी तालुक्याचे ठिकाण गाठले. तेथे उच्च माध्यमिक पर्यंतचे शिक्षण शेवगाव येथे पूर्ण केले. सिव्हील इंजिनिअरची पदवी काष्टी येथे संपादित करत स्पर्धा परीक्षेचा अभ्यास सुरू केला. कोरोना महामारीमध्ये वडील आणि चुलते यांचे छत्र हरपलेले असताना दुःखाला कवटाळून न बसता परिस्थितीचे दोन हात करत कुटुंबियांचे स्वप्न पूर्ण करण्यासाठी अभ्यासात थोडाही खंड पडू दिला नाही. कुटुंबियांचे स्वप्न पूर्ण करण्यासाठी जीवनात अनेक अडचणींचा सामना करत जयश्रीने महाराष्ट्र लोकसेवा आयोगाकडून घेतलेल्या परीक्षेत प्रथम प्रयत्नात यश मिळवत अभियंता पदावर आपले नाव कोरले.

अभ्यास करत असताना शिरूर (जि.पुणे) याठिकाणी एका खाजगी कॉलेजमध्ये अध्यापनाचे कार्य पार पाडले. जयश्रीचा आजपर्यंतचा हा प्रवास आताच्या तरुणाईला नक्कीच प्रेरणादायी आहे. सार्वजनिक बांधकाम विभागात अभियंता पदावर निवड झाल्याने ग्रामस्थांच्या वतीने मिरवणूक काढत नागरी सत्कार करण्यात आला. यावेळी ग्रामस्थ,महिला वर्ग मोठ्या संख्येने उपस्थित होते. सलग ३ वर्ष स्पर्धा परीक्षेचा अभ्यास केला.

ग्रामीण भागात मुलींच्या शिक्षणात अनेक अडचणी असून देखील घरच्यांनी माझ्या शब्दावर विश्वास ठेऊन माझ्या पूर्ण कुटुंबियांनी मला साथ दिली. अपयश येत राहिले, पण मी खचले नाही. प्रयत्न करत आज हे यश खेचून आणले. जिद्द, कष्ट आणि सातत्य या तीन गोष्टी असल्या की यश हमखास मिळते. हे स्पर्धेचे युग आहे. येथे टिकण्यासाठी खूप संघर्ष असतो आणि त्यात जो पाय घट्ट रोवून उभा राहतो तो जिंकतोच, असा मोलाचा सल्ला तिने स्पर्धा परीक्षेची तयारी करणाऱ्यांना दिला आहे.