म. टा. प्रतिनिधी, छत्रपती संभाजीनगर : जाधववाडी बाजार संकुलात उभारण्यात येत असलेल्या बस डेपोसाठी स्मार्ट सिटी डेव्हलपमेंट कॉर्पोरेशनने ‘महावितरण’कडे हायटेन्शन लाइन टाकण्यासाठीचा प्रस्ताव सादर केला आहे. ही लाइन टाकल्यावर ई-बससाठी किमान २५ चार्जिंग स्टेशन्स उभारण्याचे नियोजनही ‘स्मार्ट सिटी’च्या माध्यमातून करण्यात आले आहे.

शहराची सार्वजनिक वाहतुकीची गरज लक्षात घेत महापालिकेने ‘स्मार्ट सिटी’च्या माध्यमातून शहरात सिटी बससेवा सुरू केली आहे. सध्या डिझेलवर चालणाऱ्या शंभर सिटी बस शहरातून धावत आहेत. त्यात ३५ ई-बसची भर घालण्याचा निर्णय ‘स्मार्ट सिटी’ने घेतला आहे. हैदराबाद येथील एका एजन्सीकडून या बस भाडेतत्त्वावर घेतल्या जाणार असून, त्या शहरात चालवण्यात येणार आहेत. या सर्व बस वातानुकुलित असतील, अशी माहिती देण्यात आली आहे. त्याशिवाय छत्रपती संभाजीनगर शहरासाठी पीएम ई-बस योजनेतून शंभर बस मंजूर झाल्या असून, केंद्र सरकारच्या माध्यमातूनच त्या उपलब्ध करून दिल्या जाणार आहेत. त्यामुळे डिझेलवर चालणाऱ्या शंभर ई-बसशिवाय १३५ ई-बस येत्या काळात शहरात धावती. त्यापैकी ३५ ई-बस एप्रिल किंवा मे महिन्यातच प्राप्त होण्याची शक्यता आहे.
देणाऱ्याचे हात हजारो….दुबळी ‘पालिकेची झोळी’; जलवाहिनीमुळे पाणी वाढले, मात्र मिळणार कमीच, कारण…
‘वातानुकुलित बस मिळणार’

‘महावितरण’कडील प्रस्तावाविषयी माहिती देताना ‘स्मार्ट सिटी’च्या सिटी बस विभागाचे मुख्य चालन अधिकारी संजय सुपेकर म्हणाले, ‘जाधववाडी बाजार संकुलातील बस डेपोसाठी हायटेन्शन लाइन टाकून देण्याची मागणी ‘महावितरण’कडे करण्यात आली आहे, तसा प्रस्तावही पाठवण्यात आला आहे. आठ-दहा दिवसांत हे काम सुरू होईल अशी आशा आहे. हायटेन्शन लाइन टाकल्यावर ई-बससाठीचे चार्जिंग स्टेशन्स उभारण्याचे काम लगेचच सुरू केले जाईल. सुरुवातीला किमान २५ चार्जिंग स्टेशन उभारलेजावेत असा प्रयत्न केला जाणार आहे. चार्जिंग स्टेशनचे काम पूर्ण होताच हैदराबाद येथील एजन्सीकडून ३५ ई-बस शहरात दाखल होतील, त्यानंतर त्या प्रवाशांच्या सेवेत दिल्या जातील. ई-बस शहरासाठी पर्वणी ठरेल असा विश्वास त्यांनी व्यक्त केला. सर्व बस वातानुकुलित असल्यामुळे त्याचे वेगळे आकर्षण असणार आहे.’