मुंबई : राष्ट्रवादीकडून (अजित पवार गट) राज्यसभेसाठी प्रफुल पटेल यांना उमेदवारी देण्यात आलेली आहे. राष्ट्रवादीचे प्रदेशाध्यक्ष सुनील तटकरे यांनी त्यांच्या नावाची घोषणा केली. आज दुपारी भाजपचे तीन आणि शिवसेना शिंदे गटाचा राज्यसभेचा उमेदवार जाहीर झाल्यानंतर राष्ट्रवादीची बैठक संपन्न झाली. त्या बैठकीत प्रफुल पटेल यांच्या नावावर शिक्कामोर्तब करण्यात आलं. उद्या दुपारी साडे बारा वाजता ते राज्यसभेचा अर्ज भरतील, असं तटकरे यांनी सांगितलं.

विशेष म्हणजे प्रफुल पटेल जून २०२२ मध्येच राज्यसभेवर निवडून गेले होते. परंतु त्यांना राजीनामा द्यायला सांगून पुनश्च अर्ज भरण्याच्या सूचना पक्षाने दिलेल्या आहेत. त्यांच्या रिक्त होणाऱ्या जागेवर मे महिन्यात निवडणूक होईल, त्यावेळी आम्ही दुसरा उमेदवार देऊ, असंही सुनील तटकरे यांनी सांगितलं. काही तांत्रिक गोष्टींमुळे पक्षाने हा निर्णय घेतल्याचंही ते म्हणाले.

भाजप आणि शिंदे गटाकडून कोण उमेदवार कोण उमेदवार?

भारतीय जनता पक्षाने आज दुपारी राज्यसभा निवडणुकीसाठी त्यांच्या उमेदवारांची नावे जाहीर केली आहेत. नुकतेच भाजपमध्ये प्रवेश केलेले ज्येष्ठ नेते अशोक चव्हाण त्याचबरोबर मेधा कुलकर्णी आणि अजित गोपछडे यांना राज्यसभेची उमेदवारी देण्यात आलेली आहे. दुसरीकडे विद्यमान केंद्रीय मंत्री नारायण राणे यांचा पत्ता मात्र भाजपने कापलेला आहे. भाजपचे सरचिटणीस विनोद तावडे तसेच पंकजा मुंडे यांच्या नावाचीही चर्चा होती. मात्र पुन्हा एकदा त्यांना ‘वेटिंग’ करावी लागणार आहे.

शिंदे गटाकडून देवरा राज्यसभेवर जाणार

मिलिंद देवरा हे शिंदे गटाकडून राज्यसभेचा अर्ज भरतील. एकेकाळी दक्षिण मुंबईचे प्रतिनिधित्व करणारे देवरा आता शिंदे गटातून राज्यसभेत जातील. दक्षिण मुंबई देशातील श्रीमंत लोकसभा मतदारसंघांपैकी एक आहे.

काँग्रेसकडून चंद्रकांत हंडोरे यांना उमेदवारी

महाराष्ट्रातून राज्यसभेच्या सहा जागा रिक्त होत आहेत. संख्याबळाचा विचार करता भाजप-अजित पवार गट आणि शिवसेनेच्या महायुतीला पाच जागा मिळण्यात काहीही अडचण नाही. महाविकास आघाडीला सहावी जागा मिळण्याची शक्यता आहे. ही जागा काँग्रेसची व संख्याबळानुसार त्याच पक्षाला मिळणे अपेक्षित आहे. काँग्रेसकडून चंद्रकांत हंडोरे यांना उमेदवारी देण्यात आलेली आहे.