नांदेड: माजी मुख्यमंत्री अशोक चव्हाण यांनी काँग्रेसला सोडचिठ्ठी देत भाजपचा झेंडा हाती घेतला आहे. त्यांच्या भाजप प्रवेशानंतर नांदेड जिल्ह्यातील काँग्रेसच्या तीन आमदारांच्या भूमिकेकडे लक्ष लागले आहे. मात्र यात काँग्रेसच्या तीन आमदारांपैकी एकाने अशोक चव्हाण यांना साथ दिली आहे, तर अन्य एक जण काँग्रेसमध्ये राहणार असल्याचे म्हटले आहे. तर अन्य एका आमदाराने अद्याप ही निर्णय घेतला नसल्याची माहिती आहे.
मविआचा लोकसभेसाठी जागा वाटपाचा फॉर्म्युला ठरला; शरद पवारांची २४ फेब्रुवारीला पुण्यात सभा
ऐनवेळी हे तिन्ही आमदार भाजपमध्ये प्रवेश करणार, अशी चर्चा सुरु आहे. पक्षाच्या विधिमंडळातील उद्या होणाऱ्या बैठकीत हे चित्र स्पष्ट होईल. नांदेड जिल्ह्यात अशोक चव्हाण यांच्या नंतर काँग्रेसचे तीन आमदार आहेत. देगलूरमधून जितेश अंतापूरकर, नांदेड दक्षिणमधून मोहन हंबर्डे आणि हदगाव हिमायतनगरमधून माधवराव पाटील जवळगावकर या आमदारांचा समावेश आहे. हे तिन्ही आमदार अशोक चव्हाण यांचे निकटवर्तीय आणि विश्वासू आहेत. अशोक चव्हाण यांच्यामुळे हे तिन्ही आमदारांनी विजय मिळवला आहे. चव्हाण यांच्या भाजप प्रवेशानंतर या तिन्ही आमदाराच्या भूमिकेकडे लक्ष लागले होते.

तिन्ही आमदार भाजपमध्ये जाणार असल्याची चर्चा देखील सुरू होती. मात्र या घडामोडीनंतर आमदार मोहन हंबर्डे यांनी आपण काँग्रेस पक्षात असल्याचे म्हटले आहे. कोणी ही अफ़वा पसरू नये. मतदार संघातील जनतेशी आणि कार्यकर्त्याशी बोलून पुढील निर्णय घेणार असल्याचे हंबर्डे म्हणाले. दरम्यान देगलूरचे आमदार जितेश अंतापूरकर यांनी अशोक चव्हाण यांना साथ दिल्याची माहिती आहे. मागील तीन दिवसांपासून आमदार अंतापूरकर हे अशोक चव्हाण यांच्या सोबत मुंबईला आहेत.

दुसरीकडे हदगाव हिमायतनगरचे आमदार माधव पाटील जवळगावकर यांच्या भूमिकेकडे सर्वांचे लक्ष लागले आहे. त्यांनी अद्यापपर्यंत कुठलीच भूमिका घेतली नाही. कार्यकर्त्याशी चर्चा करून पुढील निर्णय घेणार असल्याचे जवळगावकर म्हणाले. विशेष म्हणजे ज्या दिवशी अशोक चव्हाण यांनी आमदारकीचा राजीनामा दिला, त्या दिवशी जवळगावर हे मुंबईला तातडीने रवाना झाले होते. दरम्यान उद्या विधिमंडळ पक्षाची मुंबईत बैठक होणार आहे या बैठकीला कोण कोण हजर राहते यावरूनच पुढील चित्र स्पष्ट होईल.