नागपूर: ‘व्हॅलेंटाईन डे’ च्या दिवशी प्रेयसीवर असल्याच्या संशयावरून मित्राची भरदिवसा चाकूने वार करून हत्या करण्यात आली. अजनी पोलीस ठाण्यांतर्गत येणाऱ्या नाईक नगर येथे भरदिवसा ही घटना घडली. सुरज उर्फ बिहारी महतो (बालाजी नगर) असे मृतकाचे नाव आहे. तर बिपीनकुमार गुप्ता (२५) असे आरोपीचे नाव आहे. या घटनेची माहिती वाहतूक पोलिसांनी नियंत्रण कक्षाला दिली असून या हत्येत सहभागी असलेल्या आरोपीला वाहतूक कर्मचाऱ्याने स्वतः पकडून पोलिसांच्या ताब्यात दिले.
विशेष म्हणजे गेल्या १२ दिवसांत शहरातील हत्येची ही दहावी घटना असून त्यामुळे पोलिसांच्या कार्यपद्धतीवर प्रश्नचिन्ह उपस्थित होऊ लागले आहेत. भरदिवसा एका गुन्हेगाराच्या निर्घृण हत्येनंतर बुधवारी नागपूर शहर पुन्हा हादरले. मृतक सूरज उर्फ बिहारी अमीर महतो हा बालाजी नगर परिसरात राहतो. मृतक सुरज हा गुंड असून त्याच्यावर सुमारे २१ गंभीर गुन्हे दाखल आहेत. ऑगस्ट २०२३ मध्येच त्याला नागपूर शहर आणि ग्रामीण भागातून २ वर्षांसाठी हद्दपार करण्यात आले होते. मात्र तो शहरातच राहत होता.
मृतक सुरज आणि आरोपी बिपीनकुमार गुप्ता हे मित्र होते. सूरज आणि बिपिन कुमार दोघेही उत्तर प्रदेशचे रहिवासी आहेत. काही वर्षांपूर्वी ते कामाच्या शोधात नागपुरात आले होते. दोघेही गुन्हेगारी प्रवृत्तीचे होते. सुरजची बिपिनच्या प्रेयसीशी मैत्री होती. गेल्या काही दिवसांपासून बिपीनला दोघांवर संशय आला. बिपिनने त्याच्या प्रेयसीला सुरजसोबत मैत्री तोडण्यासाठी सांगितले. मात्र तिने नकार दिला. सुरजमुळे आपली प्रेयसी आपल्यासोबत बोलत नसल्याचा संशय बिपिनला आला. त्यामुळे बुधवारी बिपिनने सूरजला भांडण सोडवण्यासाठी बोलावले. सुरज हा दुचाकीवरून नाईकनगर चौकात येताच बिपीन आणि त्याच्या साथीदारांनी त्याच्यावर चाकुने वार केले.
सूरज जीव वाचवण्यासाठी धावू लागला. आरोपींनी त्याचा ‘फिल्मी स्टाइल’मध्ये पाठलागही केला. त्यानंतर सूरजने नाईक नगर येथील विठ्ठलराव शिरसाठ यांच्या घरात शिरत मदतीसाठी आरडाओरडा सुरू केली. मात्र, आरोपींनी सूरजच्या गळ्यावर चाकूने वार करत त्याची हत्या केली. बुधवारी दुपारी मानेवाडा चौकात कर्तव्यावर असलेले वाहतूक एएसआय कमलकांत रोकडे यांना एका ऑटोचालकाने नाईक नगर गल्लीत एका तरुणाला काही लोक मारहाण करत असल्याचे सांगितले. या माहितीवरून कमलकांत त्यांच्या महिला सहकारी संध्या ढोक यांच्यासह त्यांच्या दुचाकीवर तात्काळ घटनास्थळी पोहोचले.
त्यावेळी त्यांना एक पल्सर गाडी रस्त्याच्या कडेला पडलेली दिसली. काही अंतर गेल्यावर त्यांना विठ्ठलराव शिरसाठ नावाच्या व्यक्तीच्या घरात एका तरुणाचा रक्ताने माखलेला मृतदेह दिसला. लोकांकडे चौकशी केली असता त्यांनी सांगितले की, आरोपी नुकताच येथून पळून गेला होता. त्यानंतर कमलकांत रोकडे यांनी थोड्या अंतरावर जाऊन आरोपी बिपीन गुप्ता याला पकडले. त्यानंतर त्याने साथीदारांसह हत्या केल्याची कबुली दिली. यानंतर कमलकांत यांनी पोलीस नियंत्रण कक्षाला या घटनेची माहिती दिली. या घटनेची माहिती मिळताच अजनी पोलिसांनी वरिष्ठ अधिकाऱ्यांसह घटनास्थळी पोहोचून मृतक सूरजचा मृतदेह शवविच्छेदनासाठी रुग्णालयात पाठवले. आरोपीला ताब्यात घेऊन त्याच्या इतर साथीदारांचा शोध सुरू केला आहे.