म. टा. खास प्रतिनिधी, मुंबई : खारच्या उच्चभ्रू वस्तीमध्ये राहणाऱ्या महिलांना जेवणातून गुंगीचे औषध देऊन दोन नोकरांनी सुमारे ५० लाखांपेक्षा अधिक किंमतीचे दागिने लंपास केल्याची घटना समोर आली आहे. या महिलांना भोजनातून गुंगीचे औषध किंवा झोपायच्या गोळ्या दिल्याची शक्यता पोलिसांनी व्यक्त केली असून या प्रकरणी खार पोलिस ठाण्यात गुन्हा दाखल करण्यात आला आहे.
सोने-चांदी आणि हिऱ्याचे दागिने करण्याचा व्यवसाय करणारे झव्हेरी कुटुंब खार परिसरात वास्तव्यास आहे. त्यांच्या घरामध्ये दोन नोकर कामासाठी होते. एक नोकर महिनाभरापासून तर दुसरा नोकर दहा दिवसांपासून काम करत होता. शनिवारी रात्री झव्हेरी यांची पत्नी, मुलगी, पुण्याहून आलेली एक नातेवाईक महिला आणि मोलकरीण यांनी भोजन केले आणि त्या झोपल्या. रविवारी सकाळी अन्य एक व्यक्ती घरी आली त्यावेळी या सर्वजणी गाढ झोपेत होत्या. त्याने सर्वांना उठविण्याचा प्रयत्न केला मात्र त्यांना त्रास होऊ लागला. यानंतर या चौघींना जवळच्या रुग्णालयात नेऊन उपचार करण्यात आले.
हा सर्व प्रकार संशयास्पद वाटल्याने पडताळणी केल्यानंतर हे दोन्ही नोकर गायब असल्याचे आढळले. बेडरुम तसेच इतर खोल्यांमधील सामान अस्ताव्यस्त पडलेले आढळले. घरातील कपाटातून ५० लाखांपेक्षा अधिक किंमतीचे दागिने गायब असल्याचेही लक्षात आले. गुंगी उतरल्यानंतर या महिलांनी घडलेला प्रकार सांगितला. त्यांच्या जेवणात नेमके काय मिसळले होते हे वैद्यकीय अहवालातून स्पष्ट होईल, असे पोलिसांनी म्हटले आहे. झव्हेरी कुटुंबीयांनी केलेल्या वर्णनावरून पोलिस या नोकरांचा शोध घेत आहेत.
लालबागमध्ये ७० लाखांची दागिने चोरी
लालबाग येथील नारायण उद्योग भवन येथील दागिन्यांच्या दुकानातून चालकानेच ७० लाखांपेक्षा अधिक किंमतीचे दागिने चोरले. या प्रकरणी दुकानमालकाने दिलेल्या तक्रारीवरून चालक कान्हाराम जाटविरुद्ध काळाचौकी पोलिस ठाण्यात गुन्हा दाखल करण्यात आला आहे. दुकानाच्या ड्रॉवरमध्ये ठेवलेले दागिने जाट याने कुणाचे लक्ष नसताना लांबविले.