मुंबई: सरकारच्या विरोधात सर्वत्र असंतोष आहे. मात्र धारावीत असंतोष जास्त आहे. मी तुमच्यासाठी लढायला उतरलो आहे. तुम्ही सोबत राहणार आहात की नाही, असा सवाल शिवसेना पक्षप्रमुख उद्धव ठाकरेंनी धारावीकरांना विचारला आहे. ते आज धारावीत बोलत होते. यावेळी उद्धव ठाकरेंनी सरकारवर जोरदार निशाणा साधला आहे. राज्यात गुंडागर्दी वाढत असल्याचे वक्तव्य त्यांनी यावेळी केले आहे.
दरम्यान उद्धव ठाकरे आज धारावीत आले होते. त्यांनी आज धारावीकरांसोबत संवाद साधला. यावेळी उद्धव ठाकरे म्हणाले की, विरोधकांच्या मागे काही लावून द्यायचं आणि त्यांना फोडून आपल्या पक्षात घ्यायचं. आपल्यातील नाही मात्र इथले तिथले काही लोक त्यांच्यात गेले आहेत. विकाऊ माल विकला गेला हरकत नाही. मात्र माझे निष्ठावंत मावळे माझ्यासोबत आहेत तोपर्यंत चिंता नाही. त्यामुळे आम्ही जिंकणार म्हणजे जिंकणारच.
ते पुढे म्हणाले की, मोर्चा काढला तेव्हाच मी बोललो होतो. धारावीकरांना तात्पुरती व्यवस्था म्हणून इथून उचलतील आणि मिठागरात नेऊन टाकतील. तेव्हा निर्णय झालेला नव्हता. सरकारमधील काही लोक बोलले की असं काही होणार नाही. उध्दव ठाकरे हे असंच काही बोलत आहेत. मात्र काही दिवसांपूर्वी जागा कोणी मागितली? आपण मुंबईकरांसाठी कांजूरमार्गाची जागा मागत होत. तेव्हा केंद्र सरकार कोर्टात गेलं होतं. जेव्हा जागा मागत होतो, तेव्हा दिली नाही. मात्र आता पंतप्रधानांच्या मित्रासाठी म्हणजे अदानींसाठी मुलुंडची जागा दिली आहे.
साथ सगळ्यांची हवी मात्र विकास फक्त माझ्या मित्रांचा व्हावा, असं त्यांना वाटतं. मात्र मी असं होऊ देणार नाही. माझ्या धारावीकरांना विकास हवा तो पण इथेच हवा, अशा शब्दात ठाकरेंनी भाजपला सुनावलं आहे. ठाकरे म्हणाले की, तुम्हाला असं वाटत असेल तर घरं बांधेपर्यंत दिली मिठागरात जागा मात्र तुम्ही एकदा मिठागरात गेलात तर तुम्हाला पुन्हा धारावी दिसणार नाही. कारण ही अदानींच्या घशात घातली जात आहे. नंतर जागा तर गेलीच आणि मिठागरही गेलं असं होईल, असं उद्धव ठाकरेंनी धारावीकरांना सांगितलं.
ठाकरे म्हणाले की, या धारावीत तुम्ही पिढ्यानपिढ्या राहत आहात. जेव्हा तुमच्यावर संकट आलं होतं. तेव्हा तुमच्या मदतीला कोण आलं होतं का? पंतप्रधान आणि अदानी आले होते का? मात्र आता दिसतील. आता कोरोना नाही आहे. माझ्या धारावीकरांना ५०० फुटांचं घर मिळालं पाहिजे, ही आमची पहिली मागणी आहे. इथे कोंडवारा करुन इथल्या लोकांना मिठागरात फेकायचं. तसेच इथे उपऱ्यांची वस्ती बसवणार असाल आणि सगळा पैसा जर अदानींच्या खिशात घालणार असाल तर माझ्या धारावीकरांनी काय पाप केलं आहे, असा सवाल ठाकरेंनी सरकारला विचारला आहे.
धारावीककरांनी काही गुन्हा केला नाही. इतके वर्ष जिथे राहिले ती धारावी आधी कशी होती, आताही कशी आहे? आता धारावीला सोन्याची किंमत आली आहे. मात्र मुंबईतून उद्योगधंदे घेऊन जात आहे. डायमंड मार्केट घेऊन गेले. आणखी काही घेऊन गेले. मात्र हेही त्यांना कमी पडतयं म्हणून पूर्ण मुंबई अदानींच्या खिशात घालायला निघाले आहे. जो काही टेंडरचा घोळ झाला तो तुम्हाला माहित आहे. आपलीच लोक घुसवून कसा अदानींना फायदा होईल हे पाहून टेंडर देऊन टाकायचं, अशा कठोर शब्दात ठाकरेंनी टीका केली आहे.