मुंबई: शिवसेना (उद्धव बाळासाहेब ठाकरे) पक्षाचे माजी नगरसेवक अभिषेक घोसाळकर यांची फेसबुक लाइव्ह दरम्यान हत्या करण्यात आली. त्यानंतर हत्या करणारा आरोपी मॉरिस नरोन्हा याने स्वत:वर गोळी झाडून आत्महत्या केली. या घटनेने बोरिवलीच्या आय. सी. कॉलनी परिसरात एकच खळबळ माजली. याच परिसरातील मॉरिसच्या कार्यालयात ही सारी घटना घडली.
घोसाळकर यांची हत्या केल्यानंतर मॉरिसने आत्महत्या केल्यामुळे या हत्येचं गूढ वाढलं आहे. मुंबई पोलिसांची गुन्हे शाखा या प्रकरणाचा तपास कर आहे. तरी या घटनेमागील खरे कारण अद्याप समोर आलेलं नाही.
नेमकं काय घडलं?
दोघांनी परस्परातील वाद मिटवून एकत्र येण्याचा निर्णय घेतला आणि मग मॉरिस फेसबुक लाइव्हच्या निमित्ताने घोसाळकर यांना कार्यालयात नेलं. घोसाळकर आणि मॉरिस यांनी फेसबुक लाइव्ह सुरु केले तेव्हा कार्यालयात ते दोघेच होते. यादरम्यान, मॉरिस दोन ते तीनवेळा कॅमेऱ्याच्या बाजुला झाल्याचं व्हिडिओमधून दिसून येतं. फेसबुक लाइव्ह सुरु झाल्याच्या काहीच मिनिटांत मॉरिसने घोसाळकरांवर गोळ्या झाडल्या. यावेळी त्यांना चार गोळ्या लागल्या. घोसाळकर जीव वाचवण्यासाठी समोरील काच तोडून बाहेर कोसळले.
त्यानंतर मॉरिसने घोसाळकर हे मृत झाल्याची खात्री केली. त्यानंतर त्याच बंदुकीने स्वत:च्या डोक्यात गोळी मारण्याचा प्रयत्न केला. पण, बंदुकीतील गोळ्या संपल्या होत्या. मग तो पहिल्या मजल्यावर गेला, तिथे पुन्हा बंदुक लोड केली आणि मग स्वत:वर गोळ्या झाडून त्याने आत्महत्या केली. हा सारा प्रकार अवघ्या सव्वा चार मिनिटांमध्ये घडला.
बॉडीगार्डच्या रिव्हॉल्वरने हत्या
मॉरिसने उत्तर प्रदेशचा परवाना असलेले अंगरक्षक अमरेंद्र मिश्रा याचे रिव्हॉल्वर घोसाळकरांची हत्या आणि स्वत:च्या आत्महत्येसाठी वापरले. पोलिसांनी आता अंगरक्षक अमरेंद्र मिश्राला हत्यार प्रतिबंधक कायद्यांतर्गत अटक केली आहे.
मॉरिस आणि घोसाळकर यांच्याच राजकीय वैमनस्य
मॉरिस आणि अभिषेक यांच्यामध्ये राजकीय वैमनस्य होते. मॉरिसला एका बलात्काराच्या गुन्ह्यात तुरुंगात जावे लागले होते. यामागे घोसाळकर यांचा हात असल्याचा संशय मॉरिसला होता. आर्थिक तसेच काही जमिनीच्या व्यवहारांमुळेही दोघांमध्ये वितुष्ट निर्माण झाले होते. अनेक वर्षांपासून मनात खदखदत असलेला असंतोष मॉरिसने अभिषेक यांची हत्या करून काढल्याचे म्हटले जात आहे.
सध्या गुन्हे शाखा या घटनेमागील नेमकं कारण शोधण्यासाठी तपास करत आहे. हत्या आणि आत्महत्या असे दोन तपास युनिट ११ आणि युनिट १२ ही दोन पथकं करीत आहेत.