जळगाव : वाळूमाफियांनी उपजिल्हाधिकाऱ्यांवर प्राणघातक हल्ला केल्याची खळबळजनक घटना जळगाव जिल्ह्यातील तरसोद फाटा ते नशिराबाद दरम्यान मंगळवारी (दि.६) मध्यरात्री साडेअकराच्या सुमारास घडली. या हल्ल्यात निवासी उपजिल्हाधिकारी सोपान रामनाथ कासार हे गंभीर जखमी झाले आहेत. या प्रकरणी विठ्ठल पाटील नामक एका संशयितास नशिराबाद पोलिसांनी ताब्यात घेतले आहे.
मंगळवारी रात्री अवैध वाळू वाहतुकीविरुद्ध कारवाई करण्यासाठी निवासी उपजिल्हाधिकारी सोपान कासार, तहसीलदार विजय बनसोडे हे अन्य दोन जणांसह शासकीय वाहनाने (क्र. एम एच २८, सी ६४२१) गेले होते. त्यांना अवैध वाळू वाहतूक करणारे दोन डंपर दिसले. यापैकी एक डंपर न थांबता पुढे गेल्याने त्याचा पाठलाग करून त्याला जळगावच्या दिशेने परत आणण्यात आले. त्या ठिकाणी निवासी उपजिल्हाधिकारी सोपान कासार हे शासकीय वाहनात बसलेले असताना सात ते आठ जणांनी थेट कासार यांच्यावर हल्ला चढवला. कासार यांच्यावर डोक्यावर लोखंडी रॉड मारल्याने मोठ्या प्रमाणात रक्तस्त्राव झाला. घटनेची माहिती मिळताच जिल्हाधिकारी आयुष प्रसाद, पोलिस अधीक्षक एमसीव्ही महेश्वर रेड्डी यांनी शासकीय वैद्यकीय महाविद्यालय व रुग्णालयात भेट देत जखमी कासार यांची विचारपूस केली.
नऊ जणांवर गुन्हा
याप्रकारणी नशिराबाद पोलीस ठाण्यात संशयित विशाल उर्फ विक्की उर्फ मांडवा, गौतम पानपाटील, विठ्ठल पाटील, आकाश युवराज सपकाळे, योगेश उर्फ रितीक दिगंबर कोळी, अमोल छगन कोळी, संदीप ठाकुर, शिवकुमार इंगळे, अक्षय नामदेव सपकाळे (सर्व रा. जळगाव) यांच्यावर गुन्हा दाखल करण्यात आला आहे
जीवे मारण्याच्या उद्देशानेच हल्ला
कासार यांनी आपल्या सहकाऱ्यांसोबत डम्परचा पाठलाग सुरु केला. चालकाने डंम्पर हे तरसोद गावात जाणाऱ्या रस्त्यावर डंम्पर चालु स्थितीत जागीच सोडुन पळुन गेला. यावेळी कासार हे डम्पर चालक हा कुठे गेला?, हे पाहत असतांना सर्व संशयित प्राणघातक हत्यारनिशी कासार यांच्या अंगावर धावुन आले.लाथाबुक्यांनी रोडावर आडवे पाडुन मारहाण व शिवीगाळ केली. तसेच गौतम पानपाटील याने त्याच्या हातातील लोखंडी टॉमी डोक्यावर मध्यभागी मारली व डावे खांद्यावर, दोन्ही माड्यांवर टॉमीने मारहाण करुन दुखापत केली. मोबाईलदेखील टॉमीने फोडला. कासार यांना वाचविण्यासाठी चालक लक्ष्मण मनोरे हे आले असता त्यांना देखील टॉमीने हातावर मारहाण करण्यात आली. यावेळी कासार हे जिव वाचविण्यासाठी शासकीय वाहनात बसण्यासाठी गेले असता हल्लेखोरांनी शासकीय वाहनावर देखील हल्ला करुन तोडफोड केल्याचे पोलिसात दिलेल्या फिर्यादीत म्हटले आहे.