जेलरोडच्या वज्रेश्वरी नगर, टाकेकर वसाहत, सातभाई नगर, जेलरोड टाकी परिसरात या कुत्र्याने शुक्रवारी (दि. २)सायंकाळी पाचच्या सुमारास क्लासहून घरी जाणाऱ्या तसेच खेळणाऱ्या चार बालकांना चावा घेतला. पालक आणि रहिवाशी धावून आल्याने मुलांचे प्राण वाचले. अद्वैत शिंदे (वय ८), प्रणव खरोटे (८), ऋषीराज पुरोहित (८), आरोही संवत्सरकर (४) अशी जखमी मुलांची नावे आहेत. त्यांना बिटको रुग्णालयात दाखल करून उपचार सुरू करण्यात आले. सोमवारपर्यंत (दि. ५) त्यांना डॉक्टरांच्या निरीक्षणाखाली ठेवण्यात येणार आहे.

मांसाहारी खाद्य विक्रेत्यांमुळे कुत्री हिंस्र

जेलरोडला अंडाभुर्जीसह इतर मांसाहारी खाद्यपदार्थ विक्रेत्यांच्या टपऱ्यांची संख्या वाढल्याने भटक्या कुत्र्यांचीही संख्या वाढली आहे. काही विक्रेते अनधिकृतपणे व्यवसाय करतात. रात्री कामावर जाणारे कर्मचारी, पहाटे क्लासला जाणारे विद्यार्थी, फिरायला जाणारे नागरिक यांच्यावर ही कुत्री हल्ला करतात. दरम्यान, नागरिकांनी तक्रार करताच संबंधित कुत्र्यासह भटक्या कुत्र्यांचा बंदोबस्त करण्याची मागणी माजी नगरसेवक शरद मोरे यांनी केली आहे.
Video: पाळीव कुत्र्याची हुशारी..! घरात शिरणाऱ्या बिबट्याला हुसकावलं, पुण्याच्या भोलूची पंचक्रोशीत चर्चा
कुत्रा पाळीव असण्याचा अंदाज

महापालिकेच्या अधिकाऱ्यांना याबाबत विचारले असता त्यांनी सांगितले की, संबंधित कुत्रा पाळीव असावा. अपघाताने तो चावला असावा. पिसाळलेला कुत्रा विनाकारण चावा घेणे, हल्ला करणे सुरुच ठेवतो. या कुत्र्याला पकडण्यासाठी दोन पथके जाळे घेऊन पाठवली. मात्र, तीन तास शोध घेऊनही तो सापडला नाही. कुत्रा आढळल्यास महापालिकेला कळवावे. दोन कर्मचारी त्याला पकडण्यासाठी तत्पर आहेत.

आमची मुले खेळत असताना या कुत्र्याने अचानक चावा घेतला. पालकांनी कुत्र्याच्या तावडीतून ओढून मुलांचा जीव वाचवला. बिटकोत समाधानकारक उपचार सुरू आहेत. या कुत्र्याचा त्वरित बंदोबस्त न केल्यास तो आणखी मुलांना गंभीर जखमी करेल. जेलरोडच्या भटक्या कुत्र्यांची संख्या नियंत्रित करावी.- राहुल शिंदे, पालक