कल्याण पूर्व शहर प्रमुख महेश गायकवाड आणि भाजप आमदार गणपत गायकवाड हे दोघे हिललाईन पोलीस ठाण्यात आले होते. यावेळी राजकीय वादातून महेश गायकवाड यांच्यावर गोळीबार झाल्याची प्राथमिक माहिती समोर येत आहे. जखमी अवस्थेत महेश गायकवाड यांना तात्काळ रुग्णालयात हलवण्यात आले. त्यांची प्रकृती गंभीर असून पुढील उपचारासाठी त्यांना ठाण्यातील रुग्णालयात दाखल केले जाणार असल्याची माहिती सूत्रांनी दिली.

दरम्यान या घटनेनं परिसरात खळबळ उडाली आहे. वरिष्ठ पोलीस निरीक्षक यांच्या दालनातच हा प्रकार घडल्यानं चर्चांना उधाण आले आहे. स्थानिक भाजप आमदार गणपत गायकवाड यांच्यासमक्ष हा प्रकार घडला आहे. यानंतर कल्याण पूर्वेत पोलिसांचा कडक बंदोबस्त लावण्यात आला आहे. तसेच कल्याण शिवसेना शहरप्रमुख महेश गायकवाड यांच्या ऑफिसच्या बाहेर नागरिकांनी गर्दी केली आहे.