म. टा. विशेष प्रतिनिधी, नाशिक : भाजपसह सर्वच राजकीय पक्षांकडून एकीकडे नाशिक लोकसभा निवडणुकीसाठी तयारी सुरू असतानाच शिवसेनेच्या ठाकरे गटाचे माजी आमदार वसंत गिते यांनी विधानसभेसाठी ‘फिल्डिंग’ लावण्यास प्रारंभ केला आहे. त्यासाठी त्यांनी गुरुवारी केलेली ‘मिसळ डिप्लोमसी’ चर्चेचा विषय ठरली.
नाशिक मध्य मतदारसंघातून ठाकरे गटाकडून निवडणूक लढविण्यासाठी इच्छुक असलेल्या गितेंनी नववर्षानिमित्त सर्वपक्षीय समर्थक व कार्यकर्त्यांसाठी ‘मिसळ डिप्लोमसी’च्या माध्यमातून जोरदार शक्तिप्रदर्शन केले. या पार्टीला ‘मविआ’तील नेत्यांनी हजेरी लावली असली, तरी गितेंच्या भाजपमधील शुभचिंतकानी मात्र यावेळी अंतर राखले. गतवेळी गितेंच्या वाढदिवशी त्यांना आमदारकीची शुभेच्छा देणे भाजपमधील बड्या नेत्यांना भोवले होते. त्यामुळे यावेळी अंतर राखल्याची चर्चा आहे.
नाशिक मध्य मतदारसंघातून ठाकरे गटाकडून निवडणूक लढविण्यासाठी इच्छुक असलेल्या गितेंनी नववर्षानिमित्त सर्वपक्षीय समर्थक व कार्यकर्त्यांसाठी ‘मिसळ डिप्लोमसी’च्या माध्यमातून जोरदार शक्तिप्रदर्शन केले. या पार्टीला ‘मविआ’तील नेत्यांनी हजेरी लावली असली, तरी गितेंच्या भाजपमधील शुभचिंतकानी मात्र यावेळी अंतर राखले. गतवेळी गितेंच्या वाढदिवशी त्यांना आमदारकीची शुभेच्छा देणे भाजपमधील बड्या नेत्यांना भोवले होते. त्यामुळे यावेळी अंतर राखल्याची चर्चा आहे.
राज्यातील विधानसभा निवडणूक ऑक्टोबर महिन्यात होणार असली, तरी त्यापूर्वी एप्रिलमध्ये लोकसभा निवडणूक होणार आहे. लोकसभा निवडणुकीनंतर महापालिकेच्या निवडणुका लागण्याची शक्यता आहे. त्यामुळे भाजपसह सर्वच राजकीय पक्षांनी लोकसभा निवडणुकीची तयारी सुरू केली आहे. गितेंनी मात्र विधासनभा निवडणुकीची तयारी आतापासूनच सुरू केली आहे. २३ जानेवारीच्या शिवसेनेच्या राज्यव्यापी कार्यकर्ता प्रशिक्षण शिबिराचे निमित्त साधून गितेंनी गुरुवारी मिसळ पार्टीचे आयोजन केले होते. तुपसाखरे लॉन्स येथील या पार्टीसाठी ठाकरे गटासह राष्ट्रवादी काँग्रेसचा शरद पवार गट व काँग्रेसच्या पदाधिकाऱ्यांसह भाजपमधील आपल्या मित्रांनाही निमंत्रित केले होते. गितेंनी मनसेच्या सत्ताकाळात नाशिक मध्यमधून आमदारकी मिळवली होती. परंतु, सन २०१४ मध्ये भाजप आमदार देवयानी फरांदेंनी त्यांचा पराभव केला होता. २०१९ मध्ये गिते निवडणुकीपासून लांब राहिले होते. परंतु, २०२४ ची निवडणूक लढवून फरांदेंना आव्हान देण्याची तयारी त्यांनी सुरू केली आहे. त्यासाठी नववर्षाच्या प्रारंभी मिसळ पार्टीच्या माध्यमातून त्यांनी मतपेरणी सुरू केली आहे.
भाजप नेते यंदा दूरच!
या सोहळ्याला भाजपचे एकमेव माजी नगरसेवक मुकेश शहाणे वगळता भाजपच्या दिग्गजांनी गैरहजेरी लावली. इतर पक्षांच्या नेत्यांनी मात्र हजेरी लावून गितेंना आमदारकीच्या शुभेच्छा दिल्या. गिते यांच्या कार्यक्रमांमध्ये उघडउघड वावरणाऱ्या त्यांच्या भाजपामधील वरिष्ठ मित्रांनी मात्र तक्रारीच्या भीतीने चार हात लांब राहत दुरून डोंगर साजरे केले. गितेंच्या वाढदिवशी त्यांना आमदारकीच्या शुभेच्छा दिल्याने भाजपच्या नेत्यांविरोधात फरांदेंनी थेट पक्षश्रेष्ठींकडे तक्रार केली होती. त्यामुळे यावेळी भाजप नेत्यांनी लांब राहूनच आमदारकीच्या शुभेच्छा दिल्या.
रंजन ठाकरेही मैदानात
राष्ट्रवादी अजित पवार गट सध्या महायुतीत असला, तरी नाशिक मध्य विधानसभा मतदारसंघात गितेंपाठोपाठ शहराध्यक्ष रंजन ठाकरे यांनीही उतरण्याची तयारी सुरू केली आहे. उपमुख्यमंत्री अजित पवार यांच्या दौऱ्यात ठाकरे यांच्या होर्डिंगवर ‘भावी आमदार’ असा उल्लेख केल्याने त्यांची आमदार होण्याची इच्छा लपून राहिलेली नाही. त्यामुळे विधानसभा जागावाटपात नाशिक मध्यची जागा राष्ट्रवादीला मिळावी यासाठी त्यांचे प्रयत्न सुरू आहेत. त्यासाठी मकर संक्रांतीनिमित्त पतंगवाटप करून त्यांनी शक्तिप्रदर्शन केले. मुलाच्या लग्नपत्रिकेच्या माध्यमातूनही शक्तिप्रदर्शनाची तयारी ठाकरेंनी सुरू केली आहे.