म. टा. विशेष प्रतिनिधी,मुंबई: राज्यामध्ये कुपोषण आणि त्यामुळे होणाऱ्या बालमृत्यूंचे प्रमाण सातत्याने वाढते आहे. यावर्षीही सात महिन्यांमध्ये राज्यात ६,२१५ बालमृत्यूंची नोंद झाली आहे. या मुलांना आरोग्य आणि शिक्षण या दोन्ही स्तरांवर पहिल्या टप्प्यात मदत देणाऱ्या अंगणवाडी सेविकांसह मदतनीस, बालविकास प्रकल्प अधिकारी यांचा महत्त्वाचा सहभाग आहे. मात्र या गटातील राज्यात ११ हजार ७३१ पदे रिक्त आहेत. पोषण आहार, आरोग्य तपासणी, कुपोषणाच्या निर्मूलनासाठी वजन घेणे, त्यांच्या नोंदी ठेवणे या महत्त्वाच्या कामांना त्यामुळे वेग येत नाही. या रिक्त पदांवर सरकार केव्हा नेमणुका करणार, हा प्रश्न उपस्थित झाला आहे. अंगणवाडी सेविका, मदतनीस यांचे रिक्त पदांमुळे सेवा देण्यात अडचणी येतात. परिणामी या ठिकाणी कुपोषणाचे प्रमाण आहे वाढण्याची शक्यता नाकारता येत नाही.
माहिती का दिली जात नाही?
माहिती का दिली जात नाही?
कुपोषण व बालमृत्यू यांचा परस्पराशी संबध नाही असा दावा यंत्रणांकडून केला जातो. मात्र कुपोषित मुलांमध्ये संसर्गाचे व त्यामुळे निर्माण होणारी आरोग्याच्या संदर्भातील गुंतागुंत निर्माण होऊन मृत्यू होण्याचे प्रमाण वाढते आहे. यासंदर्भात माहिती मागितली असता ती दिली जात नाही. एकात्मिक बालविकास प्रकल्पाच्या अंतर्गत बालमृत्यूची माहिती प्रत्येक महिन्याला देणे अपेक्षित असले तरीही ही माहिती अपलोड केली जात नाही. यावर्षी एप्रिल, मे आणि जूनमधील माहिती देण्यात आलेली नाही.
आई मुकी, वडील अपंग, लेकीनं कुटुंबाचा गाडा हाकला; नागपुरातील स्फोटानं परिवाराचा आधार हरपला
रिक्त पदांचा प्रश्न केव्हा सुटणार?
अंगणवाड्यामध्ये लहान मुलांच्या शिक्षण व आरोग्य या दोन्ही पातळ्यांवर काळजी घेतली जाते. मात्र राज्यातील ५५३ प्रकल्पांत १,१०,४४४ अंगणवाड्या असून त्यात मुख्य अंगणवाड्यांची संख्या ९७,४७३ तर १२,९७१ मिनी अंगणवाड्या आहेत. त्यामधील रिक्त पदांचा प्रश्न आजही सुटलेला नाही. या अंगणवाड्यांमध्ये ११ हजार ७३१ पदे रिक्त आहेत. ऑक्टोबर २०२३च्या आयसीडीएसच्या अहवालानुसार राज्यात अंगणवाडी मदतनीस ते बालविकास प्रकल्प अधिकाऱ्यांची एकूण ११,७३१ पदे रिक्त आहेत.
पदनाम/ रिक्त पदे
अंगणवाडी सेविका ५,०१५
मिनी अंगणवाडी सेविका ४४८
मदतनीस ४,५६४
अंगणवाडी पर्यवेक्षिका १,३९५
बालविकास प्रकल्प अधिकारी ३०९