याच रायगडमध्ये दुसरी घटना भारतरत्न डॉक्टर बाबासाहेब आंबेडकरांनी चवदार तळ्यावर केलेला सत्याग्रह जिथे पुन्हा स्वाभिमान जागवला. जो मानवतेचा स्वाभिमान होता. जो मनुवादी प्रवृत्ती समोर झुकायचं नाही तर माणूस म्हणून ताठ मानेने उभं राहायचं याचाही आवर्जून उल्लेख कोल्हे यांनी केला. लाचारी करून जर का मान दुखावली तर नजरेला नजर मिळवून प्रश्न विचारता येत नाहीत. म्हणून फक्त पक्षांच्या शिबिरांमध्ये डरकाळी फोडणारे कधी दिल्ली श्वरांना प्रश्न विचारू शकत नाहीत. माझ्या कांद्याची निर्यात का बंद केली. माझ्या शेतकऱ्याला दुधाला भाव मिळाला पाहिजे. हे दिल्ली शहराला सांगू शकत नाहीत की माझ्या महाराष्ट्रातले उद्योगधंदे का पळवलेत अरे कुठला स्वाभिमान सांगतात आणि कुठले प्रश्न विचारत आहात. हा प्रश्न आता जनता विचारते आहे, अशा शब्दात अजितदादांच्या राष्ट्रवादीचाही त्यांनी समाचार घेतला आहे.

उत्तरेकडे आयोध्याची चर्चा असली तरी महाराष्ट्राच्या मनात पंढरी आहे. कुणाच्या मुखात जय श्रीराम असलं तरी महाराष्ट्राच्या मनात राम कृष्ण हरी आहे. भगवंतांना पायरीच्या दगडाला भेटायला यावं. तुझं माझं एकच तुझं माझं काही नाही. अनेक वर्षांची उपेक्षा नाहीशी करावी तसा हा योग पवार साहेबांचे उपस्थितीने पनवेल येथे जुळून आला आहे, अशा शब्दात खासदार अमोल कोल्हे यांनी शरद पवार यांच्या उपस्थितीचे कौतुक केले. स्वतःच्या आजारपणाची परवा न करता जो पक्ष २५ वर्ष जपला वाढवला आणि त्याच पवार साहेबांना निवडणूक आयोगाच्या सुनावणी येथे जाताना अनेकांनी पाहिलं. प्रत्येक मराठी माणसाच्या डोळ्यात पाणी आलं अशाही भावना खासदार अमोल कोल्हे यांनी व्यक्त केल्या. ज्या नेत्यांने अख्खी ५५ वर्ष महाराष्ट्रासाठी चंदनासारखी झिजवली. त्याच पवार साहेबांवर आज ज्यांनी ही वेळ आणली त्यांना जागा दाखवल्याशिवाय राहणार नाही. असंच प्रत्येकाने ठरवलं आहे. हाच निर्णय आपल्याला पनवेलकरांनो घ्यायचा आहे, अशी सादही अमोल कोल्हे यांनी घातली.