म. टा. खास प्रतिनिधी, मुंबई: दिवाळीचा सण सुरू होण्याआधीच मुंबईतील बहुतांश भागात फेरीवाल्यांची संख्या प्रचंड वाढली असून, रेल्वे स्थानकाबाहेरील परिसराबरोबरच गल्लीबोळातील जागाही व्यापल्या आहेत. दादरमध्ये तर फेरीवाल्यांमुळे रस्ते आणि पदपथावरून चालणेही कठीण झाले असून, त्याविरोधात कारवाई करण्याऐवजी फेरीवाल्यांच्या मागणीनंतर पालकमंत्री दीपक केसरकर यांनी दादरमध्ये दिवाळीपर्यंत कारवाई न करण्याच्या सूचना मुंबई महापालिकेला केल्या आहेत. या अजब सूचनेमुळे मुंबईतील अन्य भागातही फेरीवाल्यांविरोधातील पालिकेची कारवाई थंडावणार असल्याचे स्पष्ट झाले असून, स्थानिकांसह इतर नागरिकांमध्येही नाराजी आहे.
ज्येष्ठांसाठी ‘डे केअर सेंटर’
मुंबईतील बहुतांश रस्त्यांवर फेरीवाल्यांचा विळखा असल्याने याविरोधात पालिकेच्या वॉर्डकडेही तक्रारी केल्या जातात. मुंबई उपनगरी रेल्वे स्थानक हद्दीत तर हे नित्याचेच आहे. रेल्वे स्थानक फेरीवालामुक्त करण्यासाठी स्थानकापासून १५० मीटर परिसरात फेरीवाले आढळल्यास त्यावर कारवाई करण्याच्या सूचना सर्वोच्च न्यायालयाच्या आहेत. या सूचनांचे पालन करताना पालिकेच्या अतिक्रमण निर्मूलन पथकाकडून कारवाई केली जाते. मात्र, ही कारवाई न जुमानता पुन्हा फेरीवाले आढळतात. सणासुदीच्या दिवसांत मुंबईतील फेरीवाल्यांची संख्या प्रचंड वाढते. त्यात दिवाळीत विविध वस्तूंची विक्री करणाऱ्या फेरीवाल्यांचे प्रमाण जास्तच असते. दादर पश्चिममध्येही गेल्या काही दिवसांत फेरीवाल्यांची संख्या वाढल्याने पालिकेच्या जी उत्तर विभागातील अतिक्रमण व निर्मूलन विभागाने कारवाई सुरू केली. ६ आणि ७ नोव्हेंबरला ७९ फेरीवाल्यांविरोधात कारवाईचा बडगा उचलला आणि त्यांचे सामान जप्त करतानाच दंडही ठोठावला. यामध्ये रस्त्यांवर अनधिकृतपणे फटाक्यांची विक्री करणारे फेरीवालेही होती. मात्र या कारवाईनंतर फेरीवाल्यांनी पालकमंत्री दीपक केसरकर यांच्याकडे कारवाई न करण्याची मागणी केली. त्यांच्या मागणीचा विचार करता दिवाळीपर्यंत दादरमधील फेरीवाल्यांविरोधात कारवाई न करण्याच्या सूचना मुंबई महापालिकेला दिल्याचे केसरकर यांनी मंगळवारी पालिकेत घेतलेल्या पत्रकार परिषदेत सांगितले. पाडवा संपला की फेरीवाल्यांना जागा रिकामी करण्याच्या सूचनाही केल्याचे ते म्हणाले. दिवाळीनंतर रस्ते, पदपथ मोकळे झाले पाहिजे. फेरीवाल्यांनी विक्रीसाठी मोठ्या प्रमाणात सामानाची खरेदी केली असून कारवाईमुळे त्यांचे नुकसान होऊ शकते. त्यामुळे त्यांच्या निवेदनानंतर माणुसकी म्हणून दिवाळीपर्यंत कारवाई न करण्याच्या सूचना दिल्याचे त्यांनी यावेळी स्पष्ट केले. बुधवारी रस्त्यांवर फटाक्यांची अनधिकृतपणे विक्री करणाऱ्या फेरीवाल्यांविरोधातही जी उत्तर विभागाच्या अतिक्रमण विभागाने कारवाई केली. यामध्ये धारावी, दादर पश्चिममधील १९ फेरीवाल्यांवर कारवाई करण्यात आली.
दिवाळी पहाट कार्यक्रमांत काय गायचं कळलं नाही तर मी सरळ …वाचा काय म्हणतोय राहुल देशपांडे
ज्येष्ठांसाठी ‘डे केअर सेंटर’
न्यूयॉर्कच्या धर्तीवर मुंबईत ज्येष्ठ नागरिकांसाठी डे केअर सेंटर म्हणजे काळजीवाहू केंद्र उभारले जाणार आहे. त्याचा प्रस्ताव तयार झाला असून आठ ते दहा दिवसांत त्याची अंमलबजावणी होईल. पुस्तके, वृत्तपत्रे, खानपान सेवा आदी सुविधा उपलब्ध केल्या जाणार असल्याचे केसरकर म्हणाले. दादर, माहिम, माटुंगा परिसरातील मासे आणि भाजीपाला मार्केटची स्थिती सुधारण्याचा निर्णय घेतला आहे. रंगरंगोटी, साफसफाई, आसनव्यवस्था आदी सुविधाही दिल्या जाणार असल्याचे सांगितले. तसेच मुंबईत आधुनिक प्रकारचे नऊ प्रसाधनगृहे बनवण्याचाही प्रस्ताव असून त्यातही आधुनिक सुविधा असतील, अशी माहिती त्यांनी दिली. मुंबईतील प्रदूषण कमी करण्यासाठी फटाक्यांचा कमीत कमी वापर करण्याचे आवाहन त्यांनी केले. विद्यार्थ्यांनी फटाके वाजवू नये, यासाठी आवाहन करणारे उपक्रमही सुरू केल्याचे सांगितले.