पुणे विद्यापीठात गेल्या तीन दिवसांपासून सुरू असणाऱ्या अशैक्षणिक घटनांमुळे, विद्यापीठाच्या संकुलाची तुलना ही थेट ‘जेएनयु’मध्ये होणाऱ्या घटनांशी करण्यात येत आहे. गेल्या काही दिवसांच्या घटनांमुळे विद्यापीठाची प्रतिमा डागाळली असून, त्याचा फटका विद्यापीठाला आगामी काळात बसण्याची शक्यता आहे. या पार्श्वभूमीवर विद्यापीठातील प्रशासकीय यंत्रणा आणि सुरक्षा व्यवस्था ‘अॅलर्ट’ मोडवर आहे. त्यामुळेच विद्यापीठामध्ये येणाऱ्या प्रत्येकाची चौकशी आणि नोंदणी करुनच, प्रवेश दिला जात आहे. त्याचप्रमाणे वसतिगृहात केवळ रहिवाशी विद्यार्थ्यांनाच प्रवेश दिला जाणार आहे. या दोन्हींचा फटका हा प्रामुख्याने विद्यार्थ्यांनाच बसणार असून, अनेक शैक्षणिक उपक्रमांना विद्यार्थ्यांना मुकावे लागण्याची शक्यता आहे.

प्रशासन आणि पोलिसांची परवानगी आवश्यक

विद्यापीठाच्या शैक्षणिक संकुलात सभासद नोंदणी, विविध अभियान, कार्यक्रम, उपक्रम, आंदोलन आदी उपक्रम घ्यायचे असल्यास, विद्यापीठाच्या प्रशासनाची आणि पोलिसांची परवानगी घेणे आवश्यक राहणार आहे. ही परवानगी न घेणाऱ्यांवर कायदेशीर कारवाई करण्यात येणार असल्याचे विद्यापीठाने जाहीर केले आहे.

पब्लिक पर्सेप्शन सकारात्मक करा

गेल्या दीड वर्षात विद्यापीठाची नकारात्मक बाजू प्रामुख्याने पुढे येत आहे. त्यात आता घडलेल्या तीन घटनांमुळे विद्यापीठाची मोठ्या प्रमाणात बदनामी झाली आहे. यापूर्वी, जाहीर झालेल्या विविध रँकिंगमध्ये विद्यापीठाला पब्लिक पर्सेप्शन गटात अत्यल्प गुण आहेत. त्यामुळे आगामी काळात हे गुण ० होण्याचीच शक्यता अधिक आहे. त्यामुळे रँकिंग घसरण्याचीच अधिक शक्यता आहे. विद्यापीठाला पब्लिक पर्सेप्शन बदलण्यासाठी लोकांपर्यंत जाण्यासोबतच शैक्षणिक गुणवत्तेत फिनिक्स भरारी घेण्याची तातडीने गरज आहे.