आगीवर नियंत्रण मिळवताना गुरव यांच्याकडे सुरक्षासाधने नसल्यामुळे ही घटना घडल्याचे बोलले जात आहे. ते साहित्य कंत्राटदाराने पुरवणे अपेक्षित असले तरी त्याने त्याकडे दुर्लक्ष केल्याचे कर्मचारी सांगतात. परिणामी, स्थायी कर्मचाऱ्यांचे साहित्य अनेकदा वापरावे लागते, अन्यथा सुरक्षा साधनांअभावी परिस्थितीला सामोरे जावे लागते. यापूर्वीही साप पकडताना एका कर्मचाऱ्याला सुरक्षा साधनांअभावी दंश झाल्याची घटना घडली होती. तर, एक कर्मचारी साप पकडत असताना खाली कोसळून जबर जखमी झाला होता.

रविवारच्या दुर्घटनेनंतर अग्निशमन विभागातील कंत्राटी कर्मचाऱ्यांचा सुरक्षेचा मुद्दा पुन्हा चर्चेला आला असून मनपा प्रशासन त्यांच्या सुरक्षेकडे कधी लक्ष देणार, असा प्रश्न उपस्थित केला जात आहे. मिरा-भाईंदर महापालिकेच्या सूत्रांनी दिलेल्या माहितीनुसार, कंत्राटी कर्मचाऱ्यांना कमी दिले जाणारे वेतन व इतर सुरक्षा साधनांसंदर्भात महापालिका आयुक्त संजय काटकर यांनी एक समिती स्थापन केली असून त्यांना अहवाल सादर करण्याचे आदेश दिले आहेत.