मुंबई : भाजपचे प्रवक्ते आणि पिंपरी चिंचवडचे माजी शहरप्रमुख असलेल्या एकनाथ पवार यांनी गेल्या काही दिवसांपूर्वी भाजपच्या सर्व पदांचा राजीनामा दिला होता. त्यानंतर एकनाथ पवार कोणत्या पक्षात जाणार? याची चर्चा रंगली होती. अखेर ठाकरे गटाने एकनाथ पवार यांना गळाला लावले आहे. आज शिवसेना पक्षप्रमुख उद्धव ठाकरे यांनी एकनाथ पवार यांना प्रवेश दिला. त्यांच्या प्रवेशाने पिंपरी चिंचवड भाजपला मोठा धक्का बसल्याचे बोलले जात आहे.
एकनाथ पवार हे पिंपरी चिंचवड महापालिकेचे नगरसेवक होते. तसेच त्यांच्यावर भाजप प्रवक्तेपद आणि शहरप्रमुख म्हणूनही जबाबदारी देण्यात आली होती. मात्र पिंपरी चिंचवडमधील अंतर्गत राजकारणाला कंटाळून एकनाथ पवार यांनी ठाकरे गटात प्रवेश केला आहे. यावेळी उद्धव ठाकरे यांनी एकनाथ पवार यांच्यावर पक्षाच्या संघटकपदाची जबाबदारी दिली आहे.
जरांगेंना पाठिंबा देत भाजपला सोडचिठ्ठी, पुण्यातील बड्या नेत्याचा रामराम, शिंदे पवारांवर टीका
यावेळी एकनाथ पवार म्हणाले, काही दिवसांपूर्वी संजय राऊत यांची भेट घेतली होती. त्यानंतर मी पक्षात येण्याचा निर्णय घेतला. यापुढे पिंपरी चिंचवड बरोबरच नांदेड जिल्ह्यातील लोहा कंधार मतदारसंघात शिवसेना वाढवण्यासाठी प्रयत्न करणार आहे. यावेळी उद्धव ठाकरे म्हणाले, भाजपने आपल्या पक्षाच्या नेत्यांचे खच्चीकरण केले. तसेच माझ्याकडे काहीही नसताना एकनाथ पवार माझ्याकडे आले आहेत. त्यांना मी काहीही देऊ शकत नाही. मात्र एकनाथ पवार यांनी जशी पिंपरी चिंचवड आणि नांदेड जिल्ह्यात काम केले. तसेच काम महाराष्ट्रभर करावं.
शिरूरच्या जागेने महायुतीचे टेन्शन वाढवले,अजित पवार गटाने दावा ठोकल्याने संघर्ष वाढणार,अमोल कोल्हेंविरोधात कोण?
एकनाथ पवार यांनी भाजप का सोडली?
एकनाथ पवार हे भाजपचे निष्ठावान कार्यकर्ते होते. तसेच ते नितीन गडकरी यांचे निकटवर्तीय मानले जात होते. मात्र पिंपरी चिंचवडमध्ये भाजप आमदार महेश लांडगे यांचा वाढता हस्तक्षेप, तसेच स्थायी समितीच्या अध्यक्षपदी डावलल्यामुळे निर्माण झालेली नाराजी, त्यांना डावलून उमा खापरे यांना दिलेली विधान परिषदेची संधी या कारणांमुळे एकनाथ पवार यांनी भाजप सोडल्याची चर्चा आहे. त्याबरोबरच पिंपरी चिंचवडमधून भाजपच्या वतीने संधी मिळण्याची शक्यताही कमी असल्याने एकनाथ पवार यांनी ठाकरे गटात प्रवेश केला आहे.
वडील गेले न् माझी चूक झाली, माफ करा… ठाण्यातीलच शिंदे समर्थक माजी आमदाराची शरद पवारांना साथ
लोहा कंधार विधानसभा मतदारसंघावर एकनाथ पवार यांचा दावा
एकनाथ पवार यांचे मूळ गाव नांदेड जिल्ह्यातील लोहा आहे. त्यामुळे या मतदारसंघाचे माजी आमदार आणि विद्यमान खासदार प्रताप पाटील चिखलीकर यांच्यावरही एकनाथ पवार यांनी टीका केली. तसेच लोहा कंधारच्या विकासासाठी काम करणार असल्याचे म्हटले आहे. त्यामुळे एकनाथ पवार यांनी लोहा कंधार विधानसभा मतदारसंघातून उमेदवारीचे संकेत दिले आहेत.
लोहा कंधार जागेवरून इंडिया आघाडीत संघर्षाची शक्यता
सध्या शामसुंदर शिंदे हे शेतकरी कामगार पक्षाचे विद्यमान आमदार आहेत. शेतकरी कामगार पक्ष इंडिया आघाडीतील घटक पक्ष आहे. त्यामुळे शेतकरी कामगार पक्ष एकनाथ पवार यांना ही जागा सोडण्याची शक्यता कमी आहे. त्यामुळे एकनाथ पवार यांना लोहा कंधार मतदार संघातून उमेदवारीचा शब्द दिला असेल तर त्यावरून इंडिया आघाडीत संघर्ष होण्याची शक्यता आहे.