१६ जानेवारी २०१८ रोजी म्हैसूरहून याची सुरुवात झाली. सुमारे दोन वर्षे प्रवास सुरू होता. त्या वेळी भूतानच्या सीमेवर प्रवास करताना देशभर कोव्हिडच्या प्रादुर्भावामुळे ब्रेक घ्यावा लागला. त्या वेळी दीड वर्षे घरीच होतो. त्यानंतर लसीचे डोस घेऊन १५ ऑगस्ट २०२२ रोजी पुन्हा प्रवासाला सुरुवात झाली. यानंतर उत्तर भारताचा दौरा करून आता आम्ही महाराष्ट्रात पोहोचलो आहोत. या प्रवासात आम्ही मठ, मंदिरे, गुरुद्वारांत मुक्काम करतो. प्रवासाची ठरावीक वेळ निश्चित नसते. वातावरणाचा अंदाज घेत प्रवासाला सुरुवात करीत असून, सायंकाळपर्यंत प्रवास सुरू असतो,’ अशी माहिती डी. कृष्णकुमार यांनी दिली. ‘पालकांच्या निधनानंतर त्यांच्या फोटोला हार घालण्याऐवजी ते जिवंत असताना त्यांची सेवा केली पाहिजे. लहानपणापासून आपल्यासाठी कष्ट करणाऱ्या आई-वडिलांची वृद्धत्वामुळे आबाळ होणार नाही, याची मुलांनी काळजी घेतली पाहिजे,’ असे आवाहनही त्यांनी केले.