चंद्रपूर : थंडावलेल्या मराठा आरक्षणाची धग जालन्यातील आंदोलनामुळे पुन्हा वाढली. मराठ्यांना ओबीसींमध्ये समाविष्ट करण्याची चर्चा पुढे आली. या चर्च्यांमुळे ओबीसी समाजातील काही घटक अस्वस्थ झाले आहेत. एकीकडे मराठा आरक्षणासाठी जरांगे पाटलांचे आंदोलन सुरू असतानाच ओबीसींचा एक आवाज चंद्रपुरात घुमला. या आवाजाने सत्ताधारी गोटात चलबिचल सुरु झाली. हा आवाज होता चंद्रपूर जिल्हातील वेंडली गावातील एका शेतकरी पोराचा. त्याचं नाव आहे रवींद्र टोंगे. ओबीसींच्या हिताचा मागण्या घेऊन हा तरुण १२ दिवसांपासून अन्नत्याग आंदोलन करीत आहे. शेतकऱ्याचं पोर, ऑपरेटर ते आता ओबीसी आंदोलनाचा नायक टोंगे यांचा प्रवास आहे.
एका हातात नांगर, एका हातात पेन
एका हातात नांगर, एका हातात पेन
टोंगे यांचे वडील विलास टोंगे यांना सहा एकर शेतजमीन आहे. मुख्य व्यवसाय शेतीच. वडिलांना हातभार लावत असतानाच टोंगे यांनी शिक्षणाकडेही गांभीर्याने लक्ष दिलं. गोंडवाना विद्यापीठ गडचिरोली येथून त्यांनी बी. कॉम, एम. कॉमची पदवी घेतली. टोंगे यांनी संगणक ज्ञान मिळविलं. गावातील ग्रामपंचायतेत डेटा एन्ट्री ऑपरेटर पदावर दोन वर्ष काम केलं. बँकिंग,
अकाउंट फॅकल्टी, आधार नोंदणी अशा कामातून त्यांनी आर्थिक स्त्रोत वाढविले. आई, वडील, भाऊ, पत्नी, मुलगा असा परिवार टोंगे यांचा आहे.
ओबीसी विद्यार्थी महासंघाचे जिल्हाध्यक्ष
सामाजिक कार्यात टोंगे हिरिरीने सहभाग घ्यायचे. ओबीसींच्या न्याय हक्कासाठी प्राण गेले तरी मागे हटणार नाही अशी त्यांची भावना होती. यातूनच ते ओबीसी विद्यार्थी महासंघाशी जोडले गेले. आपल्या कार्याने त्यांनी महासंघाच्या पदाधिकाऱ्यांना प्रभावित केलं. त्यांची ओबीसी विद्यार्थी महासंघाचा जिल्हाध्यक्षपदावर निवड करण्यात आली. मागील आठ वर्षांपासून ते जिल्हाध्यक्ष आहेत.
ओबीसींच्या हक्कासाठी जीव धोक्यात घातला
चंद्रपूर तालुक्यातील वेंगडी या गावातील रवींद्र टोंगे हे नाव सध्या महाराष्ट्रभर पोहोचलं आहे. टोंगे यांच्या आंदोलनाला विविध सामाजिक संघटनांनी पाठिंबा दर्शवला आहे. आज टोंगे यांची प्रकृती खालावली. त्यांना उपचारासाठी मेडिकल कॉलेज चंद्रपूर येथे हलविण्यात आले. उपचार सुरू असतानाही अन्नत्याग आंदोलन सुरूच ठेवणार, असा निर्धार टोंगे यांनी केला आहे.
सरकारच्या दुर्लक्षामुळे संताप
जरांगे पाटलांचं उपोषण सोडविण्यासाठी मुख्यमंत्री उपोषणस्थळी पोहोचले. त्यांच्याशी चर्चा केली. मात्र १२ दिवसांपासून अन्नत्याग आंदोलन करणाऱ्या टोंगे यांची दखल सरकारने अद्याप घेतलेली नाही.आज टोंगे यांचे प्रकृती खालावली. त्यांना उपचारासाठी मेडिकल कॉलेजला हलवण्यात आलं. उपोषणावर तोडगा काढण्यात सरकारला अपयश आल्याने संताप व्यक्त केला जात आहे.