संग्रामपूर: बुलढाणा जिल्ह्यातील संग्रामपूर तालुक्यातील टूनकी गावातील गणेश विष्णू लोणकर या १९ वर्षीय तरुण युवकाचा अकस्मित मृत्यू झाल्याने संपूर्ण गावांमध्ये शोककळा पसरली आहे. गणेश हा सैन्य भरतीची तयारी करत होता. तो दररोज सकाळी उठून गावातील लगतच्या रस्त्यावर धावत असे व सैन्य भरती करता करावा लागणाऱ्या व्यायाम करत असे. भरतीसाठीची सर्व पूर्व तयारी तो दररोज सकाळी उठून करत होता. त्यामध्ये धावण्याचा देखील समावेश होता. गणेश चतुर्थीच्या दिवशी १९ सप्टेंबर रोजी गणेश नेहमी प्रमाणे आपले नित्यक्रम व्यायाम करून झाल्यानंतर घरी आल्यावर त्याने चहा पाणी घेत असताना तो घरातच अचानक कोसळला.

गणेशला तातडीने तपासणी करता रुग्णालयात नेण्यात आले. मात्र हृदयविकाराचा झटका आल्याने त्याचा मृत्यू झाल्याचे डॉक्टरांनी घोषित केले. विशेष म्हणजे तीन वर्षांपूर्वी गणेशच्या मोठ्या भावाचे देखील विजेच्या धक्क्याने अकस्मित निधन झाले होते. गणेश हा आई-वडिलांना एकुलता एकच होता. सैन्य भरती होऊन देशसेवा करण्याचे त्याचे स्वप्न होते. शेती आणि ड्रायव्हर म्हणून काम करणाऱ्या वडिलांच्या कष्ट कुठेतरी थांबावे. यासाठी तो सतत मेहनत घेत होता, मात्र देश सेवा करण्याचे त्याचे एक स्वप्न अधुरेच राहिले. गणेशच्या अकाली जाण्याने संपूर्ण गाववर शोककळा पसरली आहे.

कुटुंबातील तरुण व्यक्तीचे अचानक जाण्याने कुटुंबावर दुखाचा डोंगर कोसळला आहे.