पुसेसावळी येथे रविवारी सायंकाळी सात ते आठच्यादरम्यान बाजारपेठेत जाळपोळ, तोडफोड ही घटना घडत असतानाच मशिदीवर एका जमावाने हल्ला चढवला. यात मुख्य दरवाजातून हा जमाव आत घुसत असताना नमाज पठणासाठी गेलेल्या नूरहसन याने हा दरवाजा बंद करण्याचा प्रयत्न केला. मात्र, जमावाने केलेल्या हल्ल्यात तो गंभीर जखमी झाला. त्याला उपचारासाठी सातारा येथील जिल्हा रुग्णालयात आणण्यात आले. मात्र, याची कल्पना नूरहसनच्या कुटुंबीयांना नव्हती. पोलिसांनी रात्री दोनच्यादरम्यान घरी जाऊन ही घटना सांगितल्यानंतर हे सर्व कुटुंबीय सातारा जिल्हा रुग्णालयामध्ये दाखल झाले. त्यांनी मृतदेहाची ओळखही पटवली. त्यानंतर नूरहसन शिकलगार याचे कुटुंबीय बाहेर आवारात बसले होते. चेहऱ्यावर दुःख आणि तणावही जाणवत होता. यावेळी मुस्लिम बांधवही जमा झाले होती. या घटनेमुळे पोलीस बंदोबस्त वाढवला होता आणि ही वेळ होती सोमवारी सकाळी साडेआठची!
जिल्हा पोलीस प्रशासनाने पुसेसावळी येथील घटनेची दखल घेऊन समाज माध्यमांवर अफवा पसरू नये म्हणून इंटरनेट सेवाही बंद करून ठेवली होती. त्यामुळे या घटनेची वाच्यता मोठ्या प्रमाणात झाली नाही हे पोलिसांचं यश! एव्हाना घटनेचे गांभीर्य पाहता मुस्लिम बांधव जिल्हा रुग्णालय परिसरात जमा होऊ लागले. पोलिसांनी या बांधवांमध्ये झालेल्या चर्चेमध्ये मुस्लिम बांधवांनी मृतदेह ताब्यात घेण्यास नकार दिला. त्यामुळे वातावरण जास्तच तापले. दरम्यान,पुसेसावळीत घडलेल्या घटनेत एका तरुणाचा जीव गेल्यानंतर संतापाच्या भावनेतून जिल्हा रुग्णालय परिसरात पत्रकारांनाही सुरुवातीला वृत्तसंकलनाला अडचणी आल्या, मात्र, मुस्लिम बांधवांमधील काही लोकांशी चर्चा झाल्यानंतर कोणाचीही अडचण राहिली नाही. त्यामुळे पत्रकारांवर असलेला ताणही थोडा कमी झाला.
दुसरीकडे मृत नूरहसनची पत्नी, आई, वडील त्याच परिसरात एका कट्ट्यावर बसले होते. त्यांना भेटणाऱ्या नातेवाईककडे हंबरडा फोडत होते. वातावरण शोकमय होत, तसेच तणावग्रस्त होतं. त्यातच आम्ही मृत हसनच्या पत्नी, आई वडील व नातेवाईक बसले होते तिथे त्यांच्या जवळ गेलो. विचारपूस केली. नेमकी घटनेची माहिती घेतली. यावेळी साताऱ्यातील पत्रकार गौरी, जावेद आणि मी त्यांच्याशी संवाद साधत होतो. वेळी आम्ही तिघेच त्यांच्या जवळ होतो. मात्र, ही चर्चा सुरू असताना आमच्या भोवती चाळीस-पन्नास मुस्लिम बांधव उभे होते, पण ते तेथे बसलेल्या नूरहसनच्या कुटुंबीयांना सहानुभूती देण्यासाठी!
नूरहसनची पत्नी काय घडलं ते सांगत होती, तर दुसरीकडे आई हंबरडा फोडत होती, शेजारी वडील आणि नातेवाईक बसले होते. तर रुग्णालय आवारात दुसरीकडे मुस्लिम बांधव व पोलिसांमध्ये हसनचा मृतदेह ताब्यात घेण्याबाबत चर्चा होत होती. त्यामुळे जिल्हा शासकीय रुग्णालय परिसरात पोलीस बंदोबस्त मोठ्या प्रमाणात वाढवण्यात होता. तसेच मुस्लिम बांधवही मोठ्या प्रमाणात जमा झाले होते. पोलिस व मुस्लिम बांधवांमध्ये चर्चेच्या फेऱ्या होत होत्या. मात्र, निर्णय होत नव्हता. आश्वासनांबरोबर कडक कारवाईच्या अटी पोलिसांना घालण्यात येत होत्या. तर दुसरीकडे नूरहसनच्या पत्नीला तिनं तिचा जोडीदार तर कुटुंबीयांना आपल्या एकुलत्या एक मुलाचा नाहक बळी गेल्याचं दुःख अनावर झालं होतं. त्याचं कारणही तसंच होतं नूरहसनचं लग्न वर्षांपूर्वी झालं होतं. त्याची पत्नी आठ महिन्याची गरोदर होती. तिच्यापुढे प्रश्न होता बाळाच्या आबूचा! नूरहसनचा नाहक बळी गेला याचा तर दुःख होतच पण वर्षभरातच संसाराची गाठ तुटली होती.
नूरहसन हा शिकलगार दाम्पत्याचा एकुलता एक मुलगा होता. नूरहसन यांचे वडील उर्दू शाळेमध्ये शिक्षक तर आई वैद्यकीय क्षेत्रात नर्स म्हणून कार्यरत आहे. आई-वडिलांची स्वप्न साकार करीत नूरहसन याने सिव्हिल इंजिनिअर ही पदवी प्राप्त केली होती. तसेच त्यांनी स्वतःचा बांधकाम व्यवसायही सुरू केला होता. या व्यवसायासाठी लागणारे साहित्य तसेच जेसीबीही त्यांनी काही महिन्यांपूर्वीच खरेदी केला होता. सर्वकाही सुरळीत चाललेले असतानाच रविवारी रात्री उसळलेल्या दंगलीत नूरहसन यांना नाहक जीव गमवावा लागल्याने शिकलगार कुटुंबीयांचा एकमेव आधारही हरपला.
नूरहसनची पत्नी सांगत होती, हसन आपली कामे आटपून नमाज पठणासाठी मशिदीत गेला होता. तेव्हा जेवण करण्यासाठी कधी येणार, असे नूरहसनला विचारले असता साडेनऊ वाजेपर्यंत येतो, असा निरोप दिला. साडेनऊ वाजेपर्यंत नूरहसन घरी आलाच नाही. त्यामुळे पत्नीने पुन्हा फोन करून विचारले तेव्हा त्यांनी सांगितल. “मशिदीवर दगड पडत आहेत, तुम्ही दरवाजा बंद करा, मी मशिदीमध्येच आहे. मात्र त्यानंतर त्याचा संपर्क झाला नाही. रात्री उशिरा पोलीस घरी आले आणि त्यांनी सांगितले… नूरहसनला सातारा जिल्हा रुग्णालयात दाखल केले आहे. येथे येऊन पाहतो, तर त्याचा मृत्यू झाल्याचे आम्हाला समजले, हा त्या रात्रीचा भयावह अनुभव त्याची पत्नी सांगत असतानाच तिला अश्रू अनावर झाले.
Satara : साताऱ्यातील पुसेसावळीत तणाणपूर्ण शांतता, पोलीस तैनात, आतापर्यंत ३६ जणांना अटक, इंटरनेटबाबत अपडेट
दरम्यान, या ठिकाणी पोलीस प्रशासन आणि मुस्लिम बांधवानी जाणीव ठेवून योग्य निर्णय घेऊन नूरहसनचा मृतदेह अंत्यविधीसाठी घेऊन जाण्याचे ठरले. सर्व समाज बांधवांनी घेतलेल्या या संयमाच्या भूमिकेमुळे तिढा सुटला. काही वेळाने पोलीस प्रशासनाच्या मदतीने नूरहसनचा मृतदेह ॲम्बुलन्समधून पुसेसावळीला नेण्यात आला. सातारा जिल्हा रुग्णालय परिसरात जमलेली गर्दी हळूहळू ओसरू लागली आणि मुस्लिम बांधव, पोलीस व पत्रकार यांच्यावरील असलेला ताण काहीअंशी गायब झाला. मात्र, मनात चिंता राहिली ती नूरहसनच्या जन्माला येणाऱ्या बाळाची! बाळ जन्माला आल्यानंतर त्याने आईला विचारल्यावर काय सांगणार, तुझ्या आबूचा मृत्यू कशामुळे झाला. त्याचं काय चुकलं होतं…
शेख-सरडे ३५ वर्ष एकत्र राहिले, सप्ताहाची पहिली पंगत मुस्लिम समाजाकडून, पुसेसावळीत दंगल झालीच कशी? ग्राऊंड रिपोर्ट