म. टा. विशेष प्रतिनिधी, मुंबई : गणेशोत्सव, नवरात्र, दसरा, दिवाळी आणि नाताळ अशा एकापाठोपाठ येणाऱ्या आगामी सणांच्या पार्श्वभूमीवर अन्नपदार्थांची सुरक्षा राखावी, यासाठी महापालिकेने विशेष मोहीम हाती घेतली आहे. निकृष्ट दर्जाच्या मिठाईमुळे आरोग्यावर दुष्परिणाम होऊ नयेत, यासाठी १ सप्टेंबरपासून ही मोहीम सुरू करण्यात आली आहे. ही मोहीम ३१ डिसेंबरपर्यंत राबवण्यात येणार आहे.
स्वच्छतेची पाहणी
मावा व मिठाईच्या दुकानांची स्वच्छता व आरोग्याच्या दृष्टीने तपासणी करण्यात यावी, तसेच नियमांचे उल्लंघन केले असल्यास पालिकेच्या अधिनियम कलम ३९४ अंतर्गत संबधित व्यवसायिकास तपासणी अहवाल देऊन नियमांचे उल्लंघन झाल्याचे निदर्शनास आणून द्यावे, असेही पालिका प्रशासनाने स्पष्ट केले आहे. या विशेष मोहिमेंतर्गत मुंबई बाहेरून येणाऱ्या मावा, अन्य अन्यपदार्थांची तपासणी करून योग्य ती कार्यवाही करावी, असेही प्रशासनाने म्हटले आहे.
अधिकाऱ्यांना दिलेले निर्देश
-मिठाईच्या दुकानातील कामगारांनी हातमोजे तसेच मास्क वापरले आहेत का, याची पाहणी करावी.
-अस्वच्छ, खराब तसेच भेसळयुक्त पदार्थ आढळल्यास अन्न व औषध प्रशासनाच्या अधिकाऱ्यांना कळवावे.
-अन्न विषबाधेसारखी कोणतीही अनुचित घटना घडणार नाही, याची दक्षात घ्यावी.
-वैद्यकीय अधिकाऱ्यांनी आपापल्या विभागांत मिठाई विषबाधेबाबतची भित्तीपत्रके लावून जनजागृती करावी.
-ए ते टी विभागांत ३१ डिसेंबरपर्यंत केलेल्या कारवाईचा साप्ताहिक आढावा वैद्यकीय आरोग्य अधिकाऱ्यांनी द्यावा.
हे निकष पाळावे लागणार…
मावा विक्रीची दुकाने, मावा साठवलेली शीतगृहे यांची तपासणी केली जाणार आहे. याबाबत घालून दिलेल्या नियमांचे उल्लंघन केल्याचे आढळून आल्यास कारवाई, अवैध व्यवसाय करत असलेल्या दुकानांवर केलेल्या कारवाईची माहिती संबंधित अधिकाऱ्यांना द्यावी लागणार आहे.