कोकण मंडळाच्या घरांच्या सोडत प्रक्रियेत अर्जदार कुठूनही भाग घेऊ शकतात. नोंदणीकरण, कागदपत्रे अपलोड करण्यासह ऑनलाइन पेमेंटसारख्या सुविधा अँड्रॉइड आणि ऑपरेटिंग सिस्टीमवर उपलब्ध आहे. त्यासाठी Mhada Housing Lottery System हे ॲप उपलब्ध करून देण्यात आले आहे. अर्जदारांच्या सुविधेसाठी https://housing.mhada.gov.in या म्हाडाच्या अधिकृत संकेतस्थळावर अर्जनोंदणी प्रक्रिया उपलब्ध आहे. अर्जदारांना नवीन संगणकीय प्रणालीची माहिती देणारी मार्गदर्शनपर माहिती पुस्तिका, ध्वनिचित्रफिती, हेल्प फाइल या संकेतस्थळावर आहेत.
कोकण मंडळाने जाहीर केलेल्या घरांच्या सोडतीची लिंक १६ ऑक्टोबर रात्री ११.५९पर्यंत कार्यरत असणार आहे. १८ ऑक्टोबरला रात्री ११.५९पर्यंत अर्जदार अनामत रक्कमेचा भरणा ऑनलाइन करू शकतील. त्यासह १८ ऑक्टोबरला संबंधित बँकेच्या कार्यालयीन वेळेपर्यंत आरटीजीएस, एनईएफटीद्वारे हा भरणा करता येईल. सर्व कागदपत्रांची पूर्तता करणारे अर्जदारच या प्रणालीद्वारे पात्र ठरविले जातील. सोडतीसाठी पात्र अर्जांची अंतिम यादी ३ नोव्हेंबरला सायंकाळी ६ वाजता म्हाडाच्या https://housing.mhada.gov.in या अधिकृत संकेतस्थळावर प्रसिद्ध केली जाणार आहे.
प्रसिद्ध झालेल्या प्रारूप यादीवर अर्जदारांना १ नोव्हेंबरला सायंकाळी ५पर्यंत ऑनलाइन हरकती नोंदवता य़ेतील. ७ नोव्हेंबरला सकाळी ११ वाजता पात्र अर्जांची संगणकीय सोडत जाहीर केली जाईल. त्यातून अर्जदारांना सोडतीचा निकाल तत्काळ मोबाइलवर एसएमएस, ई-मेल, ॲपवर प्राप्त होईल. तसेच त्याच दिवशी सायंकाळपासून यशस्वी अर्जदारांची यादी म्हाडाच्या संकेतस्थळावर प्रसिद्ध करण्यात येणार आहे.
‘प्रधानमंत्री आवास’अंतर्गत १,०१० घरे
म्हाडाच्या कोकण मंडळ सोडतीत प्रधानमंत्री आवास योजनेअंतर्गत एक हजार १० घरे, एकात्मिक गृहनिर्माण योजनेअंतर्गत एक हजार ३७, सर्वसमावेशक योजनेअंतर्गत ९१९ घरे, टीव्ही जर्नलिस्ट असोसिएशनसाठी ६७ आणि कोंकण मंडळाच्या प्रथम येणाऱ्यास प्रथम प्राधान्य योजनेअंतर्गत विखुरलेल्या दोन हजार २७८ घरे उपलब्ध आहेत. या योजनेतील शेवटचे घर विकले जाईपर्यंत नोंदणीकरण आणि अर्जभरणा प्रक्रिया सुरू राहील. अर्जदारांच्या अडचणी निराकरणासाठी ०२२- ६९४६८१०० हेल्पलाइन क्रमांकावर संपर्क साधता येईल.
Maharashtra Rain Alert : राज्यात पावसाचा जोर वाढणार, मुंबई, ठाण्यासह २३ जिल्ह्यांना येलो अलर्ट जारी…