आता मुक्तिसंग्रामाच्या अमृत महोत्सवी वर्षाच्या सांगता समारंभासाठी केंद्रीय गृहमंत्री अमित शहा १६ सप्टेंबरला शहरात येत आहेत. मुक्तिसंग्राम दिनानिमित्याने राज्य मंत्रिमंडळाची बैठक देखील त्याच दिवशी शहरात होणार आहे. १७ सप्टेंबर रोजी मुक्तिसंग्राम दिनाचा मुख्य शासकीय कार्यक्रम होणार आहे. यासाठी मुख्यमंत्री, उपमुख्यमंत्र्यांसह राज्याचे सर्व मंत्रिमंडळ शहरात १५ सप्टेंबरच्या रात्रीच दाखल होणार आहे. मुक्तिसंग्रामाचा अमृत महोत्सव आणि मंत्रिमंडळाची बैठक या दोन्हीचे औचित्य साधून शासनाने महापालिकेला चाळीस कोटी रुपयांचा विशेष निधी दिला आहे. या निधीतून महापालिकेला प्रामुख्याने शहर सौंदर्यीकरणाची कामे करायची आहेत. त्यासाठी रंगरंगोटीचा फंडा पालिकेने स्वीकारल्याचे चित्र आहे. फेब्रुवारी महिन्यात ज्या ठिकाणी रंगरंगोटी करण्यात आली, त्याच ठिकाणी आताही रंगरंगोटी केली जात आहे.

शहरातील उड्डाणपुल, उड्डाणपुलाच्या भिंती, रस्ता दुभाजक, दुभाजकांवर लावण्यात आलेल्या लोखंडी जाळ्या, प्रमुख चौक आणि वाहतूक बेटे या ठिकाणी रंगरंगोटीचे काम सुरू आहे. अण्णा भाऊ साठे चौक ते विभागीय आयुक्त कार्यालय या रस्त्याच्या दोन्हीही बाजूने ऐतिहासिक छत्रपती संभाजीनगर शहराची ओळख करुन देणारी चित्रे काढून त्या ठिकाणीदेखील फेब्रुवारी महिन्यात रंगकाम करण्यात आले होते. आता पुन्हा त्याच ठिकाणी रंगरंगोटी केली जात आहे. सहा महिन्यात त्याच त्या ठिकाणी रंगरंगोटी करण्यात येत असल्यामुळे आश्चर्य व्यक्त केले जात आहे.

प्रशासकांनी ठेवले कानावर हात

रंगरंगोटीच्या या प्रकाराबद्दल मात्र पालिका प्रशासनाने कानावर हात ठेवले आहेत. या बद्दल प्रशासक जी. श्रीकांत यांना विचारले असता त्यांनी शहर अभियंता ए. बी. देशमुख यांना खुलासा करण्यास सांगितला. देशमुख यांनी त्याच त्या ठिकाणी रंगरंगोटी केली जात नसल्याचा दावा केला. फेब्रुवारी महिन्यात ज्या ठिकाणी रंगरंगोटी झाली नव्हती त्याच ठिकाणी रंग देण्याचे काम सुरू आहे, त्याला काही अपवाद आहेत. प्रामुख्याने अण्णा भाऊ साठे चौक ते विभागीय आयुक्त कार्यालय या रस्त्याच्या दोन्हीही बाजूने करण्यात येत असलेली रंगरंगोटी त्याला अपवाद ठरू शकेल असे ते म्हणाले.

लक्ष्मी लॉजमध्ये ‘तसले’ प्रकार सुरु, पोलिसांना खबर लागली, छाप्यात ७३ वर्षीय आरोपीसह दोघं अटकेत