डहाणू जिल्ह्यातील वरिष्ठ पोलीस निरीक्षक सुधीर संखे हे सामान्य नाहक त्रास देत असल्याच्या तक्रारी अनेक नागरिकांनी केल्या होत्या. त्यानंतर माकप आमदार कॉम्रेड विनोद निकोले यांनी आक्रमक पवित्रा घेत तारपा चौकात पोलिसांना विचारणा केली.नागरिकांना तुम्ही का त्रास देता, मला तुमची नाटकं सांगू नका, अशा शब्दात आमदार विनोद निकोले यांनी पोलीस अधिकाऱ्यांना फैलावर घेतलं. आमदार निकोले यांचा आक्रमक बाणा पाहून पोलीस अधिकाऱ्यांनी नमती भूमिका घेतली. डहाणूच्या मुख्य चौकात पोलीस नाकाबंदी लागणार नाही. यापुढे नागरिकांना त्रास होणार नाही, असा शब्द त्यांनी आमदार महोदयांना दिला.
नेमकं काय घडलं?
डहाणू शहरातील मुख्य चौकात पंधरा ते वीस पोलिसांकडून रोज कारवाई करण्यासाठी नाकाबंदी केली जाते. यामुळे मुख्य शहरात मोठ्या प्रमाणावर वाहतूक कोंडी होते . त्यामुळे ही कारवाई मुख्य चौकात न करता तपासणी नाक्यांवर करण्यात यावी अशी मागणी विनोद निकोले यांनी डहाणूचे पोलीस निरीक्षक यांच्याकडे केली होती . मात्र तरीदेखील डहाणू पोलिसांकडून ही कारवाई मुख्य चौकातच केली जात असल्याने आक्रमक झालेल्या विनोद निकोले यांनी आज भर रस्त्यात पोलीस प्रशासनाला धारेवर धरले . डहाणू सोडून जिल्ह्यातील इतर शहरांमध्ये ही कारवाई का केली जात नाही?, असा सवाल त्यांनी उपस्थित केला. उद्यापासून जर या चौकात वाहतूक पोलीस सोडून कोणी दिसलं तर दोन हजार लोक घेऊन पोलीस स्टेशनच्या आत मध्ये बसेन, असा इशारा निकोले यांनी पोलिसांना दिला.