सौरभ बेंडाळे, नाशिक : अमली पदार्थांची विक्री, पुरवठा आणि वितरणात गुंतलेल्यांवर प्रभावी कारवाई करण्यासह अमली पदार्थांच्या अधीन गेलेल्यांचे पुनर्वसन करण्यासाठी राज्य पोलिस दलात अमली पदार्थविरोधी टास्क फोर्स (एएनटीएफ) स्थापन करण्याचा निर्णय गृह विभागाने घेतला आहे. पुणे आणि नागपूर या दोन विभागात राज्यातील ग्रामीण व शहर पोलिसांची घटकनिहाय विभागणी करून या फोर्सचे स्वतंत्र कामकाज होईल. त्यासाठी विशेष पोलिस महानिरीक्षक (एसआयजी) दर्जाच्या अधिकाऱ्याच्या नेतृत्वात परिक्षेत्र आणि घटकनिहाय कारवाईचे निर्देश देण्यात आले आहेत.
पोलिस महासंचालकांच्या मार्गदर्शनाखाली पुणे येथील गुन्हे अन्वेषण विभागाचे अपर पोलिस महासंचालकांच्या नियंत्रणात हा फोर्स कार्यान्वित असेल. तर विशेष पोलिस महानिरीक्षक (एसआयजी) यांच्या अधिपत्याखाली त्याचे कामकाज होईल. प्रत्येक स्थानिक पोलिस ठाण्यात अमली पदार्थांबाबत दाखल होणाऱ्या गुन्ह्यांचा स्वतंत्र तपास या फोर्सकडून होईल. त्यावर घटकप्रमुख म्हणून उपअधीक्षक दर्जाच्या अधिकाऱ्यांचे नियंत्रण असेल. विशेषत: अमली पदार्थांची शेती नष्ट करून व्यापाऱ्यांना प्रतिबंध करणे, ड्रग पेडलर्स व तस्करांविरुद्ध प्रभारी कारवाई करून गुन्हे दोषसिद्धीचे प्रमाण वाढविणे. संशयितांची मालमत्ता तपासून त्यावरही कारवाई करणे. राज्य पोलिस दलातील अधिकाऱ्यांना या कारवाईसाठी प्रशिक्षित करणे, या स्वरुपाच्या कारवाईकरीता हा फोर्स कार्यान्वित असेल, असे गृह विभागाने स्पष्ट केले आहे.
मनुष्यबळासह खर्च नियोजन…
पुणे आणि नागपूर ही दोन मुख्य कृती कार्यालये असतील. त्याअंतर्गत घटकनिहाय कामकाज होईल. या फोर्सचे ‘एसआयजीं’चे कार्यालय, पुणे व नागपूर घटकांतील वाहनांचे इंधन, दुरूस्ती, देखभाल, शस्र व दारूगोळ्याचा पुरवठा हा संबंधित परिक्षेत्रनिहाय कार्यालयांतून होईल. यासह पुणे ‘एसआयजी’ हे कंत्राटी पदे भरण्यासाठी ते नियुक्ती प्राधिकारी असतील. तर पोलिस उपनिरीक्षक ते विशेष महानिरीक्षकांपर्यंतची पदे महासंचालक कार्यालयाकडून भरण्यात येतील. हवालदार ते उपनिरीक्षकपदे संबंधित घटकनिहाय कार्यालयातून प्रतिनियुक्तीवर असतील. शिपाई पदावरील भरती प्रक्रीया करून फोर्सच्या कार्यालयातील वर्ग होतील.
सिंहस्थ आराखडा ८ हजार कोटींवर; सिंहस्थ समन्वय समितीकडून आज आयुक्तांना होणार सादर
‘टास्कफोर्स’चे कार्यक्षेत्र
पुणे विभागांतर्गत :
कोकण – ठाणे ग्रामीण, ठाणे शहर, पालघर, रत्नागिरी, सिंधुदुर्ग, नवीन मुंबई, मिरा-भाईंदर-वसई-विरार
कोल्हापूर – कोल्हापूर, सातारा, सांगली, सोलापूर ग्रामीण, सोलापूर शहर, पुणे ग्रामीण, पुणे शहर, पिंपरी-चिंचवड
नाशिक – नाशिक ग्रामीण, नाशिक शहर, धुळे, जळगाव, अदमहनगर, नंदुरबार
नागपूर विभागांतर्गत :
अमरावती – अमरावती ग्रामीण, अमरावती शहर, यवतमाळ, बुलढाणा, अकोला, वाशिम
छत्रपती संभाजीनगर – छत्रपती संभाजीनगर ग्रामीण, छत्रपती संभाजीनगर शहर, जालना, बीड, उस्मानाबाद
नांदेड – नांदेड, लातूर, परभणी, हिंगोली
नागपूर/गडचिरोली – नागपूर ग्रामीण, नागपूर शहर, वर्धा, भंडारा, चंद्रपूर, गडचिरोली, अहेरी, गोंदिया