पुणे : राज्याचे उपमुख्यमंत्री अजित पवार यांनी राष्ट्रवादी काँग्रेसचा एक मोठा गट सोबत घेऊन शिवसेना-भाजपला साथ देत सत्तेत सहभागी होण्याचा निर्णय घेतला आहे. त्यामुळे राष्ट्रवादी काँग्रेसमध्ये उभी फूट पडली आहे. या फुटीनंतर राज्यभरात राष्ट्रवादी काँग्रेसचे कार्यकर्ते कोणासोबत असणार यासाठी शरद पवार आणि अजित पवार यांच्यामध्ये जोरदार संघर्ष पाहायला मिळत आहे. शरद पवार राज्यभर कार्यकर्त्यांच्या भेटी, मेळावे घेत आहेत. तर अजित पवार हे देखील राष्ट्रवादीच्या कार्यकर्त्यांच्या संपर्कात आहेत.
उपमुख्यमंत्री पदाची शपथ घेतल्यानंतर अजित पवार यांचे पुण्यात अनेक दौरे झाले मात्र पुण्यतील कार्यकर्त्यांना अजित पवारांचे स्वागत करण्याची संधी मिळाली नाही. दुसरीकडे नुकतेच पिंपरी-चिंचवड येथे अजित पवार यांचे ठिकठिकाणी जोरदार स्वागत करण्यात आले होते. त्यानंतर आता पुण्यात देखील अजित पवार आपली ताकद दाखवणार आहेत. त्यासाठी शहर राष्ट्रवादी काँग्रेसने कंबर कसली आहे. शहराध्यक्षपदी निवड झाल्यानंतर दीपक मानकर यांच्याकडून पक्षाचे पहिलेच शक्तिप्रदर्शन असणार असल्याने आपली पूर्ण ताकद त्यांनी पणाला लावली आहे. अजित पवारांचा हे पक्षाच्या दृष्टीने पहिलेच शक्तिप्रदर्शन असल्याने पुण्यातील कार्यकर्ते कामाला आहेत.
मनोज जरांगे पाटील आंदोलन: शासनाने GR काढला, कोणत्या मराठ्यांना दाखले मिळणार? GR मध्ये काय लिहिलंय? वाचा…
अजित पवार १० तारखेला कोल्हापूर दौऱ्यावर आहेत. त्यासाठी ते पुण्यातून रवाना होताना हे शक्ती प्रदर्शन करण्यात येणार आहे. पुण्यातील २ आमदारांपैकी हडपसरचे चेतन तुपे यांची भूमिका संभ्रमात आहे तर वडगावशेरीचे सुनील टिंगरे यांनी अजित पवारांना पाठिंबा दिला आहे. दुसरीकडे, ८० टक्के माजी नगरसेवक पदाधिकारी आमच्यासोबत असल्याचा दावा अजित पवार गटाकडून सातत्याने करण्यात येत आहे. त्यामुळे आता या दाव्यात किती दम आहे? पुण्यातील किती कार्यकर्ते अजित पवारांसोबत आहेत? हे या शक्तिप्रदर्शनातून स्पष्ट होणार आहे.