सातारा : सातारा आणि माढा मतदारसंघाचा खासदार आमच्याच विचाराचा होईल. मात्र, आमच्याविरोधात असणारे आणि आम्हाला नको असणाऱ्यांचा मी यंदा करेक्ट कार्यक्रम करणार आहे, असं म्हणत उपमुख्यमंत्री अजित पवार यांच्या नेतृत्वाखालील राष्ट्रवादीचे नेते रामराजे नाईक निंबाळकर यांनी भाजपचे राज्यसभा खासदार उदयनराजे भोसले आणि माढा मतदारसंघातील खासदार रणजीतसिंह नाईक निंबाळकर यांचे नाव न घेता त्यांच्याविरोधात भूमिका कायम असल्याचे पुन्हा एकदा दाखवून दिले आहे. एकीकडे भाजप आणि अजित पवार यांच्या पक्षाची राजकीय युती झालेली असतानाच रामराजेंनी अप्रत्यक्षपणे भाजप खासदारांना इशारा दिल्याने चर्चांना उधाण आलं आहे.
सातारा जिल्हा मध्यवर्ती बँकेत आयोजित केलेल्या पत्रकार परिषदेत रामराजेंनी हा जाहीर इशारा दिला आहे. त्यामुळे आगामी काळात होणाऱ्या खासदारकीच्या निवडणुकीत सातारा जिल्ह्यातील राजकारण चांगलेच तापणार आहे. गेल्या अनेक वर्षापासून पारंपरिक विरोधक असलेले खासदार उदयनराजे भोसले, खासदार रणजितसिंह नाईक निंबाळकर या दोघांच्या विरोधात आपी भूमिका असल्याचे रामराजे यांच्या या विधानामुळे दिसून येत आहे. त्यामुळे या दोन्ही गटांमध्ये चुरशीच्या निवडणुका होतील, असे देखील त्यांच्या या वक्तव्यामुळे पुन्हा एकदा अधोरेखित झाले आहे.
दरम्यान, येणाऱ्या काळात सातारा आणि माढाचा खासदार महायुतीच्या माध्यमातून कोण असणार, याचीच आता उत्सुकता सर्वांना लागून राहिली आहे.