‘मराठा समाजाला आरक्षण मिळवून देण्यासाठी आम्ही कटिबद्ध असून, युती शासन सत्तेवर आल्यानंतर आम्ही युवकांना नोकऱ्या, शिक्षण, शिष्यवृत्ती तसेच उद्योग व्यवसायांसाठी कर्ज, आर्थिक साह्य या माध्यमातून मदत केली. मराठा समाजाचे प्रश्न सोडविण्यासाठी आमचे प्रामाणिक प्रयत्न सुरू असताना कुणीही राजकीय स्वार्थासाठी समाजाला भडकवू नये,’ असे आवाहन मुख्यमंत्री एकनाथ शिंदे या बैठकीनंतर झालेल्या पत्रकार परिषदेत केले. ‘मराठा समाजातील विद्यार्थ्यांना ओबीसीप्रमाणे शैक्षणिक सवलती, सुविधा दिल्या जातात,’ असे सांगून मुख्यमंत्री म्हणाले, ‘सारथी संस्थेमार्फत उच्च शिक्षणासाठी फेलोशिप, स्कॉलरशिप तसेच एमपीएससी, यूपीएससी व इतर स्पर्धा परीक्षांसाठी प्रशिक्षण कार्यक्रम राबविला जातो. आत्तापर्यंत सुमारे १२ हजार विद्यार्थ्यांना ४४.५८ कोटी रुपये खर्च करून स्पर्धा परीक्षा प्रशिक्षण देण्यात आले.’

देवेंद्र फडणवीस यांच्याकडून माफी

‘जालन्यात उपोषणावेळी दुर्दैवी घटना घडली. त्या वेळी पोलिसांनी लाठीमार केला. अश्रुधुराचा वापर केला. अशा प्रकारच्या बळाचे समर्थन केले जाऊ शकत नाही,’ असे उपमुख्यमंत्री देवेंद्र फडणवीस म्हणाले. ‘माझ्या आधीच्या सत्तेच्या काळात पाच हजार आंदोलने झाली. तेव्हा कधीच बळाचा वापर केला नव्हता. आता बळाच्या वापरामुळे ज्यांना इजा झाली आहे, जे जखमी झाले आहेत, त्यांची मी क्षमायाचना करतो. क्षमा मागतो,’ असे फडणवीस म्हणाले. ‘मुख्यमंत्र्यांनी या संपूर्ण प्रकरणाची उच्चस्तरीय चौकशी करण्याचा निर्णय घेतला आहे. दोषींवर कारवाईचा निर्णय घेतला आहे. या घटनेचे राजकारण होणे योग्य नाही. काही नेत्यांनी तो प्रयत्न केला. लाठीमाराचे आदेश मंत्रालयातून आले, असे चुकीचे वातावरण निर्माण करण्यात आले,’ असा दावाही त्यांनी केला.

मराठा समाजाला आरक्षण मिळवून देण्यासाठी आम्ही कटिबद्ध असून, युती सरकार सत्तेवर आल्यानंतर आम्ही युवकांना नोकऱ्या, शिक्षण, शिष्यवृत्ती तसेच उद्योग व्यवसायांसाठी कर्ज, आर्थिक साह्य या माध्यमातून मदत केली आहे.- एकनाथ शिंदे, मुख्यमंत्री

जालन्यात जे झाले ते चूकच होते. असे होता कामा नये. वरून आदेश दिल्याचा जो सातत्याने आरोप केला जात आहे, ते चुकीचे आहे. आदेशाबाबत होणारे आरोप सिद्ध करून दाखवा.- अजित पवार, उपमुख्यमंत्री