दरम्यान पोलिसांनी आंदोलकांवर लाठीचार्ज केल्याने महिला आंदोलक जखमी झाल्याचे दिसून येत आहे. तर आंदोलकांच्या दगडफेकीमध्ये पोलीस कर्मचारी तसेच महिला पोलीस जखमी झाल्याची प्राथमिक माहिती आहे. वडीगोद्री महामार्गावर आंदोलकांच्या वतीने दोन बस जाळण्यात आल्या असून दोन बसेसवर दगडफेक करण्यात आली आहे. तसेच एक ट्रकसुद्धा जाळण्यात आल्याची प्राथमिक माहिती आहे. औरंगाबाद सोलापूर महामार्गावर तीन ते चार बसेसची जाळपोळ करण्यात आली आहे.या घटनेचे राज्यात आता प्रतिसाद उमटायला सुरूवात झाली आहे. या घटनेवर सर्व स्तरातून प्रतिक्रिया येत आहेत. दरम्यान नेते मंडळींनी या घटनेवर प्रतिक्रिया दिली आहे.

शरद पवारांची प्रतिक्रिया

या घटनेवर शरद पवारांनी प्रतिक्रिया दिली आहे. ते म्हणाले की, आंदोलक आणि पोलिसांमध्ये चर्चा झाली होती. कारण नसताना लाठी हल्ला करण्यात आला आहे. चर्चा झाल्यानंतरही पोलिसांकडून बळाचा वापर करण्यात आला. या प्रकरणात गृहखात्याकडून अतिरेकी भूमिका घेतली गेली आहे. या लाठीहल्ल्याचा मी निषेध करतो.

मुख्यमंत्री एकनाथ शिंदेंची प्रतिक्रिया

जालना येथे मराठा आरक्षणासाठी सुरू असलेल्या आंदोलनातील आंदोलकांवर झालेल्या लाठीमाराची घटना अत्यंत दुर्दैवी आहे. जिल्हाधिकारी आणि पोलीस अधीक्षकांकडून या घटनेची माहिती घेतली असून चौकशीचे आदेश दिले आहेत. जनतेने शांतता राखावी, असे आवाहन मुख्यमंत्री एकनाथ शिंदे यांनी केले आहे.

रोहित पवारांची प्रतिक्रिया

जालना जिल्ह्यातील अंतरवाली सराटी गावातील मराठा समाजाचे आंदोलन उधळण्यासाठी अमानुषपणे लाठीचार्ज करणाऱ्या राज्य सरकारचा जाहीर निषेध. राज्य सरकारला सत्तेची मस्ती चढली असून सत्तेच्या मस्तीतूनच सरकार असा लाठीचार्ज करत आहे. आता या मस्तवाल आणि घमेंडिया सरकारची मस्ती उतरवण्याची वेळ आली आहे.

अंबादास दानवेंनी प्रतिक्रिया

जालन्यातील अंतरवाली सराटी या गावात मराठा समाजाचे आंदोलन मोडून काढण्यात पोलिसांनी बळाचा, बेछूट लाठीचा वापर केला आहे. हवेत गोळीबरही केल्याचे वृत्त आहे. याचा मी निषेध करतो. शांततेने आंदोलन सुरू असताना ते दडपण्यासाठी केलेली ही कृती कोणाच्या सांगण्यावरून केली गेली याचे उत्तर गृहमंत्री @Dev_Fadnavis यांनी द्यायला हवे.

सुप्रिया सुळेंची प्रतिक्रिया

मराठा आरक्षणाच्या मागणीसाठी आंदोलन करणाऱ्या आंदोलकांवर पोलिसांनी लाठीचार्ज केला.‌ हे अतिशय संतापजनक आहे. मराठा समाजाला आरक्षण देण्याच्या भुलथापा देऊन भाजपाने मते घेतली. परंतु आरक्षणाच्या बाबतीत मराठा समाजाला केवळ आश्वासने देण्यापलीकडे भाजपाने काहीही केले नाही, ही वस्तुस्थिती आहे. मराठा, धनगर, लिंगायत आणि मुस्लिम समाजाला आरक्षण देण्याबाबत आमची भूमिका स्पष्ट आहे. परंतु भाजपाने यासंदर्भात सातत्याने संभ्रम वाढविणारी भूमिका घेतली. केंद्र आणि राज्यात एकाच पक्षाचे, विचारांचे सरकार असूनही आरक्षण दिले जात नाही हि खेदाची बाब आहे. मराठा समाजाच्या आंदोलनकर्त्यांवर लाठीहल्ला करुन भाजप सरकारने समाजाची क्रूर फसवणूक केली आहे. भाजपाने मराठा समाजाची याबद्दल माफी मागितली पाहिजे. या लाठी हल्ल्याचा निषेध.