जालना : जालना जिल्ह्यातील अंतरवाली सराटी येथे मराठा आरक्षणासाठी उपोषण करत असलेल्या नागरिकांवर पोलिसांनी लाठीचार्ज केल्याने राज्यातील राजकीय वातावरण तापलं आहे. शिवसेना उद्धव बाळासाहेब ठाकरे पक्षाचे आमदार आणि नेते आदित्य ठाकरे यांनी या घटनेवरून मुख्यमंत्री एकनाथ शिंदे यांना लक्ष केलं आहे. ‘महाराष्ट्रात स्वतःच्या हक्कासाठी आंदोलन करणंही अशक्य झालंय, दडपशाही करणारं मिंधे भाजपा सरकार युवकांच्या जीवावर उठलंय. जालन्यात आरक्षणासाठी आंदोलन करणाऱ्या समुदायावर झालेला लाठी हल्ला हा संतापजनक आहे. लोकशाही पद्धती चिरडून हुकूमशाहीच्या दिशेने वाटचाल सुरु आहे,’ अशा शब्दांत आदित्य ठाकरे यांनी आपला संताप व्यक्त केला.
‘पहिला हल्ला वारकऱ्यांवर, आता मराठा समाजातील तरुणांवर. मिंधे-भाजपा राजवट म्हणजे सध्याची मुघलाईच! आपलं राज्य लुटायचं, दिल्लीसमोर राज्य झुकवायचं, सरकारं पाडायची. निर्लज्जपणाचा कळस गाठलाय! पण महाराष्ट्र फार काळ हे सहन करणार नाही, परिवर्तन अटळ आहे,’ असंही आदित्य ठाकरे यांनी म्हटलं आहे.
‘पहिला हल्ला वारकऱ्यांवर, आता मराठा समाजातील तरुणांवर. मिंधे-भाजपा राजवट म्हणजे सध्याची मुघलाईच! आपलं राज्य लुटायचं, दिल्लीसमोर राज्य झुकवायचं, सरकारं पाडायची. निर्लज्जपणाचा कळस गाठलाय! पण महाराष्ट्र फार काळ हे सहन करणार नाही, परिवर्तन अटळ आहे,’ असंही आदित्य ठाकरे यांनी म्हटलं आहे.
शरद पवार फडणवीसांवर भडकले!
राष्ट्रवादी काँग्रेसचे अध्यक्ष शरद पवार यांनी या मुद्द्यावरून थेट राज्याचे गृहमंत्री देवेंद्र फडणवीस यांच्यावर निशाणा साधला आहे. ‘पोलिसांकडून आंदोलकांवर लाठीहल्ला करण्यात आला आहे. एकदा चर्चा केल्यानंतर बळाचा वापर करण्याची आवश्यकता नव्हती. मात्र हल्ली सामाजिक क्षेत्रात काम करणाऱ्या लोकांचे कोणतेही प्रश्न असले आणि त्याचे उत्तर न मिळाल्याने रस्त्यावर आले तर बळाचा वापर करावा, अशी सूचना गृहमंत्र्यांकडून असावी,’ असा घणाघात शरद पवारांकडून करण्यात आला.
जालन्यातील लाठीचार्जवरून राज्य सरकारचा समाचार घेताना शरद पवार पुढे म्हणाले की, ‘राज्याच्या गृहमंत्र्यांच्या मनात काही घटकांबद्दलची जी भावना आहे ती पोलिसांच्या कृतीतून दिसत असते. हे चित्र आता जालन्यात दिसलं आहे. यात पोलिसांना काय दोष द्यायचा? पोलिसांना वरून अशा सूचना आल्या आणि त्यांनी कामगिरी केली. यामुळे पोलीस आणि तरुणांमध्ये कारण नसताना कटुता वाढली आहे. परंतु याची पूर्ण जबाबदारी राज्य सरकार आणि गृहखात्याची जबाबदारी सांभाळणाऱ्यांची आहे, असं ते म्हणाले.
घटनास्थळी नेमकं काय घडलं?
मराठा आरक्षणाच्या प्रश्नावरून जालन्यात काही नागरिक उपोषणासाठी बसले होते. त्यांना काल रात्री पोलिसांनी उठवण्याचा प्रयत्न केला होता. मात्र हा प्रयत्न गावकऱ्यांनी हाणून पाडला होता. आज दुपारी पुन्हा पोलिसांनी उपोषणकर्त्यांना उठवण्याचा प्रयत्न केला असता गावकऱ्यांनी प्रचंड विरोध केल्याने पोलीस आणि गावकऱ्यांमध्ये वादावादी झाली आणि नंतर तिचे रुपांतर या लाठीचार्जमध्ये झालं आहे.
मराठा आरक्षणासाठी लढणारे विनोद पाटील काय म्हणाले?
जालन्यातील घटनेवरून मराठा आरक्षणाची कायदेशीर लढाई लढणाऱ्या विनोद पाटील यांनी सर्वपक्षीय राजकीय नेत्यांवर निशाणा साधला आहे. ‘मराठा आरक्षणाबाबत सर्वच राजकीय पक्षांनी समाजाच्या तोंडाला पाने पुसली आहेत. आरक्षणाची मागणी लावून धरणाऱ्या माझ्या भावा बहिणींना लाठ्या काठ्या खाण्याची वेळ या सरकारने आणली आहे. मराठा आरक्षणाची मागणी करणाऱ्या आंदोलकांवर सरकारने केलेल्या लाठीहल्ल्याचा मी निषेध करतो. माझा राज्य सरकारला खडा सवाल आहे की, मराठा आरक्षण कसे देणार हे तातडीने स्पष्ट करा, नाहीतर असा उद्रेक होतच राहणार. दुसरीकडे माझी मराठा समाज बांधवांना अशी विनंती आहे की, आरक्षणाची मागणी आपण ज्या शांततामय आणि कायदेशीर मार्गाने लावून धरली होती तशीच ती नेटाने लावून धरु आणि त्यात आपण तसूभरही मागे हटणार नाही. मराठा आरक्षणाचे आंदोलन आपल्याला शांततेनेच करायचे आहे. या आंदोलनाला वावगे वळण लागता कामा नये असे माझे आवाहन आहे,’ असं विनोद पाटील म्हणाले.