सायबर शाखेने दिलेल्या माहितीनुसार, फसवणुकीची एकूण रक्कम सुमारे १० कोटींच्या घरात आहे. पोलिसांनी मागील काही महिने विविध तांत्रिक पद्धतींनी तपास करत, ६५ जणांच्या फसवणुकीचे एक कोटी एक लाख रुपये संबंधित बँक खात्यांमध्ये परत केले आहेत. यामध्ये काही जणांची परदेशी नागरिकांकडून फसवणूक झाल्याचे तपासात समोर आले आहे. गेल्या वर्षी फसवणूक झालेल्यांचे ९१ लाख रुपये परत मिळाले होते.

पोलिसांना प्राप्त झालेल्या फसवणुकीच्या तक्रारींच्या तुलनेत परत मिळालेली रक्कम अवघी काही टक्के आहे. परिणामी, ऑनलाइन फसवणुकीला बळी पडलेले शेकडो तक्रारदार आपले पैसे परत मिळण्याच्या प्रतीक्षेत आहेत. दुसरीकडे अशा सायबर गुन्ह्यांच्या संख्येत दिवसागणिक भरच पडत आहे. या पार्श्वभूमीवर, आता ऑनलाइन फसवणुकीच्या प्रकरणांचा तपास जलदगतीने करण्यासाठी आवश्यक उपाययोजना करण्याची मागणी जोर धरत आहे .
वाहने भाडेतत्त्वावर देताय? सावधान; मुंबईतील घटनेने डोळे उघडतील, मोठी गॅंग पोलिसांच्या ताब्यात
तात्काळ तक्रार दाखल करा

ऑनलाइन फसवणूक झाल्याचे अनेकदा संबंधितांना खूप उशिरा लक्षात येते. परिणामी तक्रार दाखल करण्यास उशीर होतो. त्यामुळे अनेकदा तपासात अडथळे येतात. त्यामुळे नागरिकांनी फसवणूक झाल्यानंतर, काही तासांतच तात्काळ तक्रार दाखल करायला हवी. त्यामुळे पैसे परत मिळवून देण्याची शक्यता वाढते, असे शाखेच्या एका अधिकाऱ्याने सांगितले. आर्थिक फसवणूक टाळण्यासाठी जनजागृतीचे कामदेखील पोलिस आयुक्तालयाकडून केले जात आहे.