म. टा. प्रतिनिधी, ठाणे : घोडबंदर रोड भागात तीन तरण तलाव उभारण्याच्या शिंदे गटाच्या आमदाराच्या संकल्पनेस ठाकरे गटाच्या माजी नगरसेवकाने कडाडून विरोध केला आहे. एक किमी परिघाच्या क्षेत्रात एकूण तीन ऑलिम्पिक साईज तरणतलाव आणि जिम बांधण्याच्या कामाला ठाकरे गटाने केलेल्या विरोधामुळे तरण तलावाच्या वादात दोन्ही गटांकडून वादाच्या लाटा उसळण्याची शक्यता आहे.

ठाण्यात कळवा, कोपरी व वर्तकनगर या भागामध्ये नागरिकांच्या सोयीसाठी ऑलम्पिक साईज तरण तलाव आहेत. त्यामुळे शहराच्या इतर भागांत नागरिकांसाठी त्यांच्या घरानजीक पालिका प्रशासनाच्या माध्यमातून तरण तलाव उभारण्यात यावेत, अशी शिवसेना शिंदे गटाचे आमदार प्रताप सरनाईक यांची संकल्पना आहे. त्यानुसार घोडबंदर रोड येथे वेगवेगळ्या चार ठिकाणी ऑलम्पिक साईज तरण तलाव व त्याच ठिकाणी आधुनिक जिम बांधण्यात याव्यात, अशी मागणी आमदार प्रताप सरनाईक यांनी केली होती. त्याला राज्य सरकारने मंजुरी दिली आहे. प्रत्येकी १० कोटी असे चार तरण तलाव बांधण्यासाठी एकूण ४० कोटींच्या निधीमंजुरीचा शासन निर्णय झाला आहे. याची निविदा प्रक्रिया पूर्ण झाली असून पुढील महिन्यात बांधकाम सुरू होईल, असे आमदार प्रताप सरनाईक यांनी स्पष्ट केले आहे. मात्र या कामाला शिवसेनेचे (उद्धव बाळासाहेब ठाकरे) ओवळा-माजिवडा विधानसभा संपर्कप्रमुख, माजी नगरसेवक नरेश मणेरा यांनी विरोध केला आहे. तीनपैकी एक तरणतलाव तर आनंदनगर येथील सरस्वती शाळेजवळील मैदानाच्या जागेत बांधण्याचे प्रस्तावित असल्याने गेल्या दहा वर्षांपासून येथील नागरिकांच्या वापरातील मैदानाचा बळी जाणार असल्याचा आरोप मणेरा यांनी केला आहे.
Mumbai Ganeshotsav: गणेश मंडळांसाठी मोठी बातमी; आरेतील गणपती विसर्जन वादात, अधिकाऱ्यांकडून मनाईचे पत्रक जारी
पालिका आयुक्तांना पत्र

या निर्णयाबाबत फेरविचार करावा, अशी मागणी आयुक्त अभिजित बांगर यांना पत्राद्वारे मणेरा यांनी केली आहे. तरण तलावांची व्यवहार्यता तपासून अन्य सोयीसुविधांचा प्राधान्य क्रमाचा विचार होणे आवश्यक असल्याचे त्यांनी या पत्रात नमूद केले आहे.