राष्ट्रवादी काँग्रेस एकसंध आहे की, फूट पडलीये, की हे सर्व एक विचाराने सुरू आहे, हे लवकरच कळेल, असे सूचक वक्तव्यही महाजन यांनी केले. राजकारणात काय होईल, ते सांगता येत नाही. अजित पवार आणि छगन भुजबळ तसेच दिलीप वळसे पाटील हे भाजपबरोबर येतील, असे वाटत होते का, असा प्रश्न करीत जयंत पाटील यांच्या भाजप प्रवेशाविषयीही त्यांनी संकेत दिले.

स्वातंत्र्यदिनी नाशिकमध्ये महाजन यांच्या हस्ते मुख्य शासकीय ध्वजारोहण सोहळा पार पडला. त्यानंतर प्रसारमाध्यमांशी संवाद साधताना नाशिकमधील वाढत्या गुन्हेगारीविषयी उपमुख्यमंत्री तथा राज्याचे गृहमंत्री देवेंद्र फडणवीस यांच्याशी चर्चा करणार असून, ते संबंधितांना निर्देश देतील, असे महाजन म्हणाले. सध्या सत्तारूढ पक्षांमध्ये खातेवाटपावरून रस्सीखेच सुरू असली, तरी कोणाला कोणते खाते द्यायचे, हे नेते ठरवतील. सर्वसंमतीने यावर निर्णय होईल. यावरून सध्या सरकारमध्ये कोणतेही ताणतणाव नाहीत, असेही महाजन यांनी स्पष्ट केले. स्वांतत्र्यदिनाच्या सोहळ्यात पंतप्रधान नरेंद्र मोदी यांच्या भाषणामुळे संपूर्ण देश तिरंगामय झाल्याचे सांगत काँग्रेसमधील परिवार वादावर महाजन यांनी टीका केली. देशापेक्षा परिवार कसा वाचेल, यासाठीच विरोधकांचे प्रयत्न सुरू असून, ज्यांना घर वाचवायचे आहे ते धडपड करीत आहेत, असे ते म्हणाले. मुख्यमंत्री एकनाथ शिंदे यांच्यावर ठाकरे गटाचे नेते खासदार संजय राऊत यांनी केलेल्या टीकेलाही महाजन यांनी जोरदार प्रत्युत्तर दिले. तुमची सत्ता असताना मुख्यमंत्री अडीच वर्षे घराबाहेर पडले नाहीत. त्यावेळी ते घराबाहेर पडले असते, तर आज ही वेळ आली नसती, अशी टीकाही महाजन यांनी केली.

पालकमंत्री पदाबाबत वाद नाही

नाशिकच्या पालकमंत्री पदावरून भाजप, शिवसेना शिंदे गट आणि राष्ट्रवादी अजित पवार गटात छुपा संघर्ष केला आहे. त्यावरही महाजन यांनी भाष्य केले आहे. ध्वजारोहणासाठी मंत्र्यांना वेगवेगळे जिल्हे देण्यात आले आहेत. त्यामुळे पालकमंत्रिपदाच्या बदलाबाबत चर्चा सुरू आहे. मात्र, पालकमंत्रीपदाबाबत काहीच वाद नाही. ही केवळ तात्पुरती व्यवस्था असल्याचे नमूद करीत महाजन यांनी वादावर पडदा टाकण्याचा प्रयत्न केला. छगन भुजबळ यांनी नाशिकचे पालकमंत्री व्हावे, असे त्यांच्या पक्षातील कार्यकर्त्यांना वाटत असेल, तर त्यात गैर नाही, असेही महाजन म्हणाले.