सोलापूर शहरातील मुख्य बाजारपेठेतील महावीर को ऑपरेटिव्ह बँकेत चोरी करण्याचा प्रयत्न झाल्याने सोलापूर पोलीस प्रशासन हादरले होते. गुन्हे शाखेने सीसीटीव्ही फुटेजचा आधार घेत चौकशी सुरू केली. पोलिसांच्या खबऱ्याने सीसीटीव्ही पाहून रिकोर्डवरील संशयित असल्याचे सांगितले. तसेच चोरटे सध्या रेल्वे स्टेशन परिसरात थांबले असल्याची माहिती दिली. खबऱ्याने दिलेल्या माहितीनुसार, पोलिसांनी रेल्वे स्टेशन परिसरात जाऊन पाहणी केली असता चौघे मैदानात थांबले होते. पोलिसांना पाहून बँकेत चोरी करणारे संशयित चौघे पळू लागले. गुन्हे शाखेच्या पोलिसांनी चारही बाजूंनी वेढा घातला आणि चौघांना ताब्यात घेतले.

मंगळवारी पहाटेच्या सुमारास सोलापूर शहरातील मुख्य बाजारपेठ असलेल्या महावीर को ऑपरेटिव्ह बँकेत चोरीसाठी गेले. बँकेचे तीन दरवाजे तोडून आत
प्रवेश केला. लॉकर तोडण्याचा प्रयत्न केला होता, पण लॉकर तुटले नाही. शेवटी संशयित चोरट्यांनी फक्त एक मोबाईल घेऊन निघून गेले होते. हे सर्व दृश्य सीसीटीव्ही कॅमेरात कैद झाले होते. संशयित चोरट्यांनी मोठी बँक फोडली होती, पण त्यांच्या हाती काहीही लागले नव्हते. खोदा पहाड निकला चुहा, अशी परिस्थिती संशयित चोरट्यांची झाली होती. या संशयितांना ताब्यात घेताना गुन्हे शाखेचे एपीआय संजय क्षीरसागर, दिलीप किर्दक, सचिन होटकर, महेश शिंदे, राजु मुदगल, सैपन सय्यद, कुमार शेळके, अजिंक्य माने, प्रकाश गायकवाड, अविनाश पाटील, सिध्दाराम देशमुख, अजय गुंड यांनी महत्वाची कामगिरी केली आहे.