दोन वर्षांपासून हा चेंबर अशाच पद्धतीने त्यावर झाकण नसल्याने उघड्या अवस्थेत आहे. त्यामुळे या चेंबरमध्ये आतापर्यंत सात ते आठ नागरिक पडले आहेत. सुदैवाने त्यांना वाचविण्यात यश आले आहे. मोठी दुर्घटना घडण्याच्या आधी या चेंबरवर झाकण बसवावे, तसेच या परिसरातील अस्वच्छता दूर करावी, अशी मागणी येथील नागरिकांनी केली आहे. गेल्या काही दिवसांपूर्वी जळगाव शहरातील रस्त्यांसह विविध समस्यांबाबत सर्वपक्षीय नगरसेवकांनी महापालिका प्रशासनाच्या विरोधात साखळी उपोषण केलं होते.

यावेळी मंत्र्यांच्या मध्यस्थीनंतर नगरसेवकांनी उपोषण मागे घेतले. आयुक्तांनी जळगाव शहरातील समस्या मार्गी लावण्याचे आश्वासनही दिले आहे. मात्र महापालिकेच्या इमारतीपासून अवघ्या हाकेच्या अंतरावरच अशा पद्धतीने चेंबर उघडे असल्याच्या या घटनेने दिव्याखाली अंधार असल्याचे स्पष्ट झाले आहे. महापालिकेच्या इमारती पासून काहीच अंतरावरच जर अशा पद्धतीने चेंबर उघडे आणि अस्वच्छता पसरली असेल, तर इतर ठिकाणची जळगाव शहरातली परिस्थितीचा विचार न केलेला बरा. दरम्यान आता तरी दुर्घटना घडण्याआधी महापालिका प्रशासनाने संबंधित चेंबरवर झाकण बसवावे, अशी मागणी होत आहे.