या बैठकीला आमदार अॅड. आशीष शेलार, अतिरिक्त महानगरपालिका आयुक्त (पूर्व उपनगरे) अश्विनी भिडे, वाहतूक सहायक पोलिस आयुक्त, अग्निशमन दल, विविध यंत्रणांचे अधिकारी तसेच सार्वजनिक गणेश मंडळ आणि मूर्तिकार संघटनांचे पदाधिकारी, प्रतिनिधी उपस्थित होते. सार्वजनिक गणेशोत्सव मंडळ तसेच मूर्तिकार संघटनांनी मांडलेल्या विविध समस्या आणि सूचनांवर या बैठकीत चर्चा करण्यात आली. गणेशोत्सवकाळात नियमित स्वच्छता राखावी, विसर्जन मार्गांवरील रस्त्यांची देखभाल व दुरुस्ती करावी, असे निर्देश पालकमंत्र्यांनी यावेळी पालिका अधिकाऱ्यांना दिले. यंदाच्या गणेशोत्सवासाठी मुंबई महापालिकेने विविध स्तरावर पूर्वतयारी सुरू केली आहे.
यंदा मुंबईमध्ये विसर्जनासाठी ३०८ कृत्रिम तलाव, ६९ नैसर्गिक विसर्जनस्थळांची व्यवस्था करण्यात येणार आहे. मूर्तिकारांना मूर्ती घडवता यावी यासाठी ४५ ठिकाणी व्यवस्था करण्यात आली आहे. यातील प्रत्येक ठिकाणी किमान पाच ते दहा मूर्तिकार काम करू शकतील. पर्यावरणपूरक मूर्ती घडवण्यासाठी मूर्तिकारांना देण्यासाठी २०५ मेट्रिक टन शाडू माती उपलब्ध करण्यात आली आहे. मूर्तिकारांच्या मागणीनुसार अधिक माती उपलब्ध करून दिली जाणार असल्याची माहिती मुंबई महापालिकेने दिली. याशिवाय, शहरातील रस्त्यांवरील खड्डे बुजविणे, स्वच्छता, वृक्षछाटणी आदी कामेही सुरू आहेत. निर्माल्य कलशाची व्यवस्था, वैद्यकीय चमू, विसर्जनाच्या ठिकाणी जीवरक्षकांची नेमूणक आदी बाबीही निश्चित केल्याची माहिती मुंबई महापालिकेने दिली.
अनेक मूर्तिकार शाडूच्या मातीच्या प्रतीक्षेत
पालिकेतर्फे गुजरातमधून सहाशे टन शाडूची माती मागवण्यात आली. मात्र मुंबईतील अनेक गणेश मूर्तिकारांना अर्ज करूनही ही माती उपलब्ध झालेली नाही. या संदर्भात घाटकोपरमधील मूर्तिकारांनी मुंबई महापालिकेच्या एन वॉर्डसोबत झालेल्या बैठकीत नाराजी व्यक्त केली. गणेशोत्सव तोंडावर आला असतानाही शाडूची माती उपलब्ध नसल्याने पर्यावरणपूरक मूर्ती करणार कशा, असा प्रश्न उपस्थित केल्याचे बृहन्मुंबई सार्वजनिक गणेशोत्सव समन्वय समितीने सांगितले. सध्या घाटकोपरमध्ये १६० मोठी गणेशोत्सव मंडळे असून हजारो छोटी मंडळे आहेत. अर्ज केल्यानंतरही शाडूची माती उपलब्ध झाली नसल्याची तक्रार गणेश मंडळांनी केली. त्यामुळे पर्यावरणपूरक मूर्ती तयार करण्यात अडचण येत आहे, याकडे बृहन्मुंबई सार्वजनिक गणेशोत्सव समन्वय समितीचे अध्यक्ष अॅड. नरेश दहीबावकर यांनी लक्ष वेधले. साकीनाका मेट्रो स्थानक ते घाटकोपर स्थानकादरम्यान २२ गतिरोधक असून त्यांची दुरवस्था झाली आहे. त्यामुळे गणेश आगमन आणि विसर्जनावेळी अडचणी येऊ शकतात. हे पाहता हे गतिरोधक दुरुस्त करण्याची मागणी बैठकीत करण्यात आली. याशिवाय रस्त्यांवर मोठ्या प्रमाणात खड्डे पडले असून ते १३ ऑगस्टपूर्वी बुजवावेत, अशी मागणीही करण्यात आल्याचेही दहिबावकर यांनी सांगितले.
चिनी बनावटीच्या मूर्तींना आळा
चिनी बनावटीच्या मूर्तींचाही मुद्दा मंगळवारी झालेल्या बैठकीत उपस्थित करण्यात आला. त्याविरोधातही मूर्तिकारांनी तक्रारी केल्यामुळे चिनी बनवटीच्या मूर्तींवरही प्रतिबंध घालण्यासाठी पावले उचलण्याचे निर्देश पालकमंत्र्यांनी पालिका अधिकाऱ्यांना दिले. गेल्या वर्षी विसर्जन मिरवणुकीतील वाहनांवर आणि गणेश मिरवणुकीतील गणेशभक्तांवर पोलिसांनी खटले दाखल केले होते. ते मागे घेण्याबाबत योग्य ती कार्यवाही केली जाईल, असेही आश्वासन देण्यात आले.