महसूल दिनानिमित्ताने आयोजित कार्यक्रमानंतर उपमुख्यमंत्री पवार यांनी पत्रकारांशी संवाद साधला. अजित पवार म्हणाले, ‘पुरंदर विमानतळाबाबत दोन वाद आहेत. काही जणांना अलिकडे विमानतळ व्हावे असे वाटते. तर काही जणांना पलिकडे व्हावे असे वाटते. पण कोणाला काय वाटते यापेक्षा नागरी विमान वाहतूक विभागाने परवानग्या दिल्या आहेत. पुणे शहराला भविष्याचा विचार करता आंतरराष्ट्रीय विमानतळ असण्याची आवश्यकता आहे. त्यामुळे विमानतळाचे काम लवकर सुरू होणे गरजेचे आहे. गेले एक वर्ष मी विरोधी पक्षात होतो. आज दुपारी मला या गोष्टींवर बोलायचे होते. पंरतु, पंतप्रधानांच्या कार्यक्रमात वेळ कमी होता. या निमित्ताने पुणे शहराच्या दृष्टीने जे महत्वाचे प्रकल्प आहेत ते मार्गी लावण्यासाठी मी प्रयत्न करणार आहे,’ असे आश्वासन द्यायला ते विसरले नाहीत.